Infografıkany jasaǵan – Amangeldi Qııas, «EQ»
Odan bólek MIT-pen seriktestikte «Day of AI» kýrsy qazaq jáne orys tilderine aýdarylyp, beıimdelip jatyr. Atalǵan baǵdarlamany qazaq jáne orys tilinde aýdaryp qana qoımaı, onyń ishki kontenti men tabıǵaty otandyq bilim mazmunymen qamtylýy kerek.
Taǵy bir aıta keterligi, 180 myńnan astam pedagog «Ustaz» platformasynda JI boıynsha biliktilikti arttyrýdan ótti. 2025 jyldyń jazynda «О́rleý» ortalyǵy muǵalimderge jasandy ıntellektini oqý úderisinde qoldaný joldaryn úıretti. О́ıtkeni oqýshylarǵa bilim men tárbıe beretin ustazdar jasandy zerdeniń qyr-syryn oqýshylardan kem bilmeýi kerek.
Sonymen qatar «Keleshek mektepteri» jobasy aıasynda 1300-den astam mektepte sıfrlyq kabınetter, STEM jáne robottehnıka zerthanalary ashylyp jatyr. Osy kabınetter men zerthanalarda úıirme sabaqtary júredi. Úıirme sabaqtary naqty ǵylym salalary (matematıka, fızıka, hımııa, t.b. pándermen) tyǵyz baılanysty. Osy ǵylym salalarynda JI ıgilikterin qoldaný – zaman talaby.
Joldaýda aıtylǵandaı, aýyl mektepterine arnalǵan «Qazaq digital mektebi» úlgisin engizý arqyly qashyqtan oqytý múmkindigin keńeıtý josparlanyp otyr. Shalǵaıdaǵy eldi mekenderdiń jáne shaǵyn jınaqty aýyl mektepteriniń oqýshylaryna qashyqtan oqytý tehnologııasy kómegimen sapaly bilim alýyna jaǵdaı jasalady. Bilikti, sheber ári tájirıbeli ustazdar shalǵaıdaǵy aýyl balalaryna qashyqtan sabaq júrgizedi.
Kásipkerlerdi tarta otyryp, óńirlerde balalardy damytý ortalyqtaryn ashý da nazardan tys qalmaq emes. Qosymsha bilim salasy (úıirmeler) nysandaryn kóptep ashý balalardyń bos ýaqytyn tıimdi ári paıdaly uıymdastyrýǵa múmkindik beredi. Atalǵan ortalyqtar balalardyń shyǵarmashylyq, syn turǵysynan oılaý, sporttyq qabiletin damytady. Barlyq mektepke birtindep JI resýrstarǵa teń qoljetimdilikti qamtamasyz etýge tıispiz. Orta bilim uıymdarynyń (mektep, lıseı, gımnazııa, t.b.) barlyq túri JI resýrsyna qol jetkizýi kerek. Iаǵnı Prezıdenttiń Joldaýda aıtqan usynystary naqty qadamdarmen ushtasyp otyr jáne bul bilim berýde sapa men teńdikti qamtamasyz etý úshin asa mańyzdy.
Rashıt BELGIBAEV,
Y.Altynsarın atyndaǵy ulttyq bilim akademııasynyń vıse-prezıdenti
