Depýtattyń aıtýynsha, sońǵy aılarda Qazaqstan iri konsertter men sporttyq matchtardy jıi qabyldap jatyr, bul óz kezeginde IIM qyzmetkerlerin jappaı alańnan alastatýǵa ákelýde.
«Mysaly, Astanada ótken Djennıfer Lopestiń konsertine shamamen 1300 polıseı, al Almatyda – 2240 polısııa qyzmetkeri, áskerıler men eriktiler jumyldyryldy. Sonyń saldarynan paradoks jaǵdaı qalyptasady: jappaı shoý men konsertterge búkil jeke quram tartylady da kóshelerdi patrýldeýge adam qalmaıdy», – dedi depýtat Quspekov.
Oljas Quspekov memlekettik resýrstardy tıimdi ári maqsatty paıdalaný qajettigin atap ótip, kommersııalyq is-sharalardyń qaýipsizdigin qamtamasyz etý mindetin jeke sektorǵa júkteý qısyndy ekenin jetkizdi.
«Búginde elimizde 4 myńǵa jýyq jeke kúzet uıymy jumys isteıdi. Onda 100 myńnan astam kásibı qyzmetker bar, olar bul mindetti óz moınyna alýǵa daıyn», – dep qosty depýtat.
Respublica fraksııasynyń depýtattary mynadaı usynystar engizip otyr:
- kommersııalyq is-sharalarda qaýipsizdikti birtindep jeke kúzet qurylymdaryna berý;
- polısııa kúshin tek memlekettik jáne qoǵamdyq-saıası mańyzy bar oqıǵalarǵa paıdalaný.
Bul máseleniń ózektiligin 2025 jylǵy 30 qyrkúıekte Almatyda ótetin «Qaırat» – «Real Madrıd» matchy de aıqyndaıdy. Ony kúzetý úshin 2500-den astam polıseı jáne Ulttyq ulannyń 300 áskerı qyzmetkeri tartylmaq.
«Biz júıeni qaıta qaraýymyz qajet: polısııa – bul memlekettiń jáne azamattardyń qaýipsizdigi úshin, ol konsertter men jeke sharalardy kúzetý úshin emes», – dep túıindedi Oljas Quspekov.
