Qaıdan bileıin, búıtip bilgishsingen bir men emes ekenimdi... Endi mine, taıaq laqtyr – sottyń, kedenniń, ekonomıstiń baqyr basyna taq ete qalady. E, búıtip jumyssyz qalatynyn kim bilgen!..» degen bolatyn.
Amal qansha, áke armandaǵan maıshelpekterdiń sheti buıyrmaıtynyna kózim jetken soń, nede bolsa ǵylym-bilimge tumsyq suǵaıyn dep endi mine, ýnıversıtettiń kadr bóliminiń bastyǵynyń aldynda
otyrmyn.
– Bala, bizde maman jetip artylady, – dep ol kereksizdigimdi kesip aıtty.
– Qyzyl dıplommen bitirip edim, eń kishi qyzmetker bolsam da jarar, – dep mińgirlegen bolamyn.
– Átteń, aıtysker aqyn bolsań ǵoı, birden qyzmetke qonjıtyp, kandıdattyq dıssertasııańnyń taqyrybyn da bekitip berer edik, – dep týrasynan tartty.
– Taqyrybym bar, taraý-taraýlary da daıyn, tek túıer túıini ǵana qalyp edi, – degen boldym.
– E, kazir oqý ornynyń atyn aıtysker aqyn shyǵaratyn boldy ǵoı. Betke ustar Bekire balamyz jalǵyzsyrap júr. Jaqynda ǵana jalpaq jurt qatysqan dúıim dúrmekten júldeli oryn alyp, ýnıversıtet bedeli bir kóterilip qaldy. Eńbegin baǵalap, kelgenine jyl tolmasa da jataqhanadan bólek bólme berdik. Kelesi joly bas júlde alyp, ýnıversıtet atyn aspandatyp jiberse, rektordyń ózi oǵan dosenttik qyzmetti birden beremiz dep otyr.
– Oqý oryndarynyń qazirgi jaǵdaıyn aıtyp, birneshe maqala jazyp, onym oryndy baǵasyn da alyp edi, – dep qaldym.
– Bolar balany dóp basý qıyn-aý! Shirkin, eger odan sporttan aldaǵy ýaqytta álem chempıony shyǵatynyn aldyn ala biletin bolsaq, «jórgóginen-aq» ýnıversıtettiń túlegi etip, chempıon bolǵan kúni qyzmet túgil, kandıdattyq qujatyn qolyna ustatar edik.
– Ǵylymı keńes aldyda ótetin konferensııada taqyrybymdy kún tártibine engizipti...
– Elimizdiń bedeldi ýnıversıteti bolǵan soń, bizderde eki kúnniń birinde ártúrli jıyn ótip turady. Sonyń shyraıyn shyrq úıirip, jymdastyra biletin, eń aqyry dastarqan mázirin máz eter asaba qat bizde... – dep buǵan qalaısyń degendeı synaı qarady da, meniń sózimnen mezi bolǵan bolýy kerek:
– E, bala, akademık aǵamyzdan kelip otyrsyń, amal joq, jarty shtatqa ózime qyzmetke alaıyn. Aınalysatyn jumysyń – joǵaryda aıtqandaı, bizge qat maıtaban mamandardy tabý. Solardyń birin taýyp, abyroıymyzdy aspandatqan kúni mamandyǵyń boıynsha qyzmetke kirisesiń, – dedi.
...Amal joq, maıtaban mamandar tabýǵa bel sheship kirisip kep kettim.
Berik SADYR
