Kezdesýge qala ákimdigi men aýmaqtyq organdardyń ókilderi, sarapshylar, máslıhat depýtattary, Qoǵamdyq keńestiń jáne Qazaqstan halqy Assambleıasynyń músheleri, shyǵarmashylyq qaýym jáne úkimettik emes uıymdar qatysty.
«Almaty – elimizdiń eń iri megapolısi, ǵylym men bilimniń ortalyǵy. Sondyqtan Prezıdentimizdiń strategııalyq mindetterin júzege asyrýda, ásirese sıfrlyq transformasııa men jasandy ıntellektti engizýde qalamyzdyń róli aıryqsha», – dedi Almaty ákimi.
Qala ákimi búginde elimizdegi IT-qyzmet naryǵynyń 53 paıyzy Almatynyń úlesinde ekendigin atap ótti. Onyń kólemi – 4 trln teńge. Qalada Alatau Creative HUB, Farabi Hub jáne elimizdegi alǵashqy Almaty Digital Medical Center – sıfrlyq medısına ortalyǵy jumys isteıdi.
Ákim basty mindetterdiń biri – ınvestısııa kólemin arttyrý ekendinin alǵa tarta otyryp: "2030 jylǵa deıin Almatyda jalpy quny 3,6 trln teńgeden asatyn 190 joba júzege asyrylady, – dedi.
Týrızmdi damytýǵa da erekshe kóńil bólinip otyr. Negizgi joba – Almatynyń taý klasteri. Ol 2029 jylǵa qaraı Ortalyq Azııadaǵy eń iri jyl boıy jumys isteıtin týrıstik ortalyqqa aınalady. Nátıjesinde jyl saıyn shamamen 1 mln sheteldik týrıst kelip, qala ekonomıkasyna 300 mlrd teńgeden astam kiris kirgizedi.
Joldaýdaǵy mańyzdy baǵyttardyń biri – ekologııa. Bul – biryńǵaı ekologııalyq standarttardy engizý, sý resýrstaryn únemdeý jáne olardy basqarýǵa arnalǵan sıfrlyq platforma qurý. Sonymen birge, «Taza Qazaqstan» baǵdarlamasy ulttyq basymdyq retinde belgilendi.
Kezdesý sońynda Darhan Satybaldy Memleket basshysy aıqyndaǵan mindetter – barshaǵa ortaq maqsat ekenin atap ótti. Olardy júzege asyrý jergilikti atqarýshy organdardyń, aýmaqtyq qurylymdardyń, ǵylymı qaýym men azamattyq sektordyń birlesken is-qımylyn talap etedi. Qalanyń aktıvimen ótken ashyq dıalog naqty sheshimder ázirleýge jol ashady.
