«Astana Operanyń» jańa teatr maýsymynyń ashylýy – ujym úshin ǵana emes, barsha kórermen úshin de úlken mereke. Bul elordalyqtar men qala qonaqtarynyń súıikti teatr atmosferasyna qaıta boılaıtyn, ártistermen saǵynysyp qaýyshatyn keremet sát.
– Shyǵarmashylyq ujymymyz jańa teatr maýsymyna tyń ıdeıalarmen jáne kórermender aýdıtorııasynyń suranysyna saı aýqymdy jobalarmen qadam basqaly tur. Bul ǵalamat premeralarmen, san alýan festıvaldarmen, mazmundy gastroldermen, operalyq jáne balettik qoıylymdarmen este qalatyn kezeń bolmaq. Bizdiń mańyzdy bastamalarymyzdy júzege asyrýǵa Mádenıet jáne aqparat mınıstrligi úlken qoldaý bildirip jatqanyn atap ótkim keledi. Sonymen, osy kúzde sahnamyzda opera óneriniń jaýhary Dj.Verdıdiń «Rıgoletto» operasynyń kópten kútken premerasyn usynamyz, al jyldyń sońynda alǵash ret kórermenderge Tileýǵazy Beısembektiń lıbrettosyna S.Ábdinurov pen Á.Ábdinurovtyń «Qypshaq qyzy Appaq» spektaklin tanystyrmaqshymyz. Budan bólek, daryndy jastarymyzdy qoldaýǵa, óńirlerdegi jáne sheteldegi áriptesterimizben mádenı qarym-qatynasty nyǵaıtýǵa baǵyttalǵan jobalarymyz ári qaraı jemisti jalǵasyn tabady. Men «Astana Operanyń» kórermenderine daıyndaǵan tosynsyılarynyń azǵantaı bóligine ǵana toqtalyp óttim. Ujymymyzǵa jańa maýsymda shalqar shabyt pen tolaǵaı tabys tileı otyryp, barlyq óner súıer qaýymdy teatrymyzdyń eleýli jetistikteriniń kýási bolýǵa shaqyramyn, – dep atap ótti «Astana Opera» dırektory Aleksandr Sovostıanov.
«Astana Operanyń» jańa XIII teatr maýsymy áıgili «Abaı» ulttyq operasymen ashylǵany kezdeısoqtyq emes. Bir jaǵynan bul Abaı Qunanbaıulynyń rýhyna qurmet bolsa, ekinshi jaǵynan aqynnyń 180 jyldyq toıyn merekeleý, sonymen qatar osy qyrkúıekte «Abaı» operasynyń elordalyq teatr sahnasynda qoıylǵanyna 10 jyl tolady. 2015 jyly qyrkúıekte osynaý ulttyq klassıka jaýhary dırıjer Alan Bóribaev pen álemge áıgili rejısser Djankarlo del Monakonyń jańa qoıylymynda kórermenge alǵash usynyldy. Araǵa úsh jyl salyp teatr osy eńbegi úshin Qazaqstan Respýblıkasynyń mádenıet pen óner salasyndaǵy Memlekettik syılyǵyna ıe boldy.
«Abaı» operasy – ulttyq opera óneri jetistikteriniń biri sanalady. Byltyr ujym osy operany «Mýzykany kórý» halyqaralyq festıvali aıasynda Máskeýdegi Úlken teatr sahnasynda zor tabyspen usynǵan. Ár jyldary ulttyq jaýhar Italııada, О́zbekstanda shyrqalyp, sheteldik kórermenderdiń osynaý máńgilik týyndyǵa degen súıispenshiligin oıatty.
Uly Abaıdyń parasattylyq pen danalyqqa toly beınesi arqyly qazaq halqynyń bolmysy beınelengen spektakl eshkimdi beıjaı qaldyrmaıdy. Qoıylym mahabbat, jaqsylyq pen zulymdyqtyń kúresi týraly baıandap qana qoımaıdy, halqymyzdyń fılosofııalyq oı-tolǵamdaryn jáne mádenıeti men óneriniń biregeı dástúrlerin ashady. Operanyń osy ulttyq boıaýynyń birtýar sheberler Esıo Frıdjerıo men «Oskar» syılyǵynyń laýreaty Franka Skýarchapıno jasaǵan tamasha ssenografııamen jáne kostıýmdermen jarasymdy úılesim tabýy shymyldyq ashylǵan sátten bastap sońǵy kórinisterine deıin kórermenderdi Abaı ómir súrgen dáýir atmosferasyna boılatady. Eske sala keteıik, rejısserdiń keńesshisi – Qazaqstannyń Halyq ártisi Esmuqan Obaev, bas hormeıster – Qazaqstannyń eńbek sińirgen qaıratkeri Erjan Dáýitov.
Túrli kúnderi spektakl keıipkerleriniń beınelerin «Astana Operanyń» daryndy ártisteri júzege asyrady. Osy joly Abaı partııasyn Qazaqstannyń eńbek sińirgen qaıratkerleri Janat Shybyqbaev pen Talǵat Musabaev daıyndapty. Aıdardy Ramzat Balakıshıev pen Qazaqstannyń eńbek sińirgen qaıratkeri Jan Tapın oryndady. Ajar – Qazaqstannyń eńbek sińirgen qaıratkeri Saltanat Ahmetova jáne Nazym Saǵyntaı, Ázim – Beıimbet Tańaryqov, Jırenshe – Altynbek Ábilda, Talǵat Ǵaleev. Qarlyǵashtyń beınesin Saltanat Muratbekova men Tatıana Vısınskaıa somdaıdy. Kókbaı – Dinmuhamed Kóshkinbaev pen Sultan Baqytjan. Syrttannyń rólinde – Bolat Esimhanov pen Shyńǵys Rasylhan. Narymbetti Artýr Ǵabdıev pen Nursultan Ánýarbek, al Mesti Álıhan Zeınolla tanystyrady.
