Tabıǵatpen bite qaınasqan otbasy

Shańyraǵy shattyqqa toly ónegeli jan Janat Seıitqalıuly Jaqypov shırek ǵasyr boıy «Marqakól memlekettik tabıǵı qoryǵynda» zerthanashy qyzmetin abyroımen atqaryp, búginde órt kúzet­shi­si qyzmetinde júr. Qyzmetine degen jaýap­ker­shiligi men adaldyǵy ony árip­tes­­teriniń ǵana emes, tutas óńirdiń syıly aza­matyna aınaldyrdy. Tabıǵatty qorǵaý isine qosqan eleýli eńbegi úshin 2018 jyly III dárejeli, 2021 jyly II dárejeli «Bıo­lo­gııa­lyq alýan túrlilikti saqtaý isine qosqan úlesi úshin» tósbelgisimen marapattalýy sonyń aıǵaǵy.

– Áke-sheshem de osy óńirdiń týmalary. О́zim taban aýdarmaı orman salasynda eńbek etip kelemin. Týǵan jerdiń tumsa tabıǵatyn qorǵaý kásibı ǵana emes, perzenttik te paryzym, – deıdi Janat Seıitqalıuly. 

Shańyraqtyń shuǵylasy, otbasynyń uıytqysy Saǵymjan Suraýqanqyzy alty balany tárbıelep ósirip, 2010 jyly «Kúmis alqa» ıegeri atanǵan ardaqty ana. Zeınet jasyna jetkenshe ózi de osy qoryqta eńbek etip, keıingi urpaqqa izgi­lik pen eńbektiń mánin uqtyryp keledi. Jaqypovtar áýletiniń ár perzenti ata-anasynyń tálimin boıyna sińirip, túrli salada elge qyzmet etip júr. Úlken qyzdary Mádına dámdi taǵam jasaýdyń sheberi. Onyń qyzy Samıra bastaýysh­ synyp muǵa­limi, bala júregine bilim dánin seýip júr­gen jas maman.

Anar Janatqyzy býhgalterlik esepti meńgerip, qoryqta birneshe jyl eńbek etti. Salamatty ómir saltyn serik etken ol uly Eralynyń sporttaǵy jetistikterine únemi dem berip keledi. Jas sportshy búginde bıatlonnan el chempıonatynyń júldegeri.

Shyryn Janatqyzy eki balasynyń tárbıesine erekshe mán berip, otbasynyń  berekesin arttyryp otyr­ǵan aq jaýlyqty ana. Kenje qyzy Janna bolsa, ma­tematıka pániniń muǵalimi. Oblystyq «Altyn tuǵyr» baı­­qaýynda júldeger atanyp, aýdan kóle­­­min­de de úz­dik us­taz retinde tanylǵan. Búgin­de ol da kúıeýimen bir­ge týǵan jer­­diń tabı­ǵatyn qorǵaýǵa úles qosyp júr.

Uldary da áýlet abyroıyn asyryp keledi. Aıan Janatuly úsh balanyń ákesi, otba­synyń janashyry. Jary Aızada da qoryqta eńbek etip, ekologııalyq bilim berýdi jolǵa qoıǵan.

Sút kenjeleri Saıan Janatuly ishki ister organdarynda shyńdalǵan tártip saqshysy. Qazir qoryqta sharýashylyq isin basqarady. Jubaıy Dıana ıhtıo­log retinde Marqakólge ǵana tán maıqan balyǵyn qorǵaýmen aınalysady. 

Jaqypovtar áýleti tek bir otbasynyń emes, tutas óńirdiń maqtanyshy. Otyz jeti jyl boıy bir áýlettiń birneshe múshesi qatarynan qyzmet etip kele jatqan eńbek dınas­tııasy tabıǵatty aıalaý isimen  taǵdyr­la­ryn toǵystyrǵan.

43 jyl otasqan Janat aǵa men Saǵymjan apaıdyń eń úlken jetistigi – balalaryna adal­dyqty, eńbek­qorlyqty, týǵan jerge degen súıis­penshilikti úıretýi. Qarap otyr­­saq, olar­dyń shańyraǵy – birliktiń, eń­bek­tiń, týǵan jerge degen qaltqysyz mahabbattyń  aı­qyn kórinisi. Ta­bıǵatty qorǵaý isin urpaqtan-urpaqqa jalǵap kele jat­­­­qan áýlet elge, Otanǵa adal qyzmet etýdiń jar­­qyn úlgisi.

Shyǵys Qazaqstan oblysy,

Marqakól aýdany