Jıynda Premer-mınıstrdiń orynbasary – ulttyq ekonomıka mınıstri Serik Jumanǵarın óńirlik turaqtandyrý qorlaryn jańa ónimmen toltyrý jáne «Tarıfti ınvestısııaǵa aıyrbastaý» baǵdarlamasynyń júzege asyrylý barysy boıynsha baıandamalardy tyńdady.
Ulttyq ekonomıka mınıstrliginiń Tabıǵı monopolııalardy retteý komıtetiniń tóraǵasy Tımýr Qosymbaevtyń aıtýynsha, bıylǵa josparlanǵan tarıfterdiń kóterilý jumystary aıaqtalǵan, jańa ótinimder túspegen.
— Jyl sońyna deıin halyq pen jeńildigi bar tarıf saıasaty qoldanylatyn áleýmettik mańyzy bar azyq-túlik óndirýshileri úshin tarıf baǵasy óspeıdi. Bul aqyly qyzmetterdiń qymbattaýynyń ınflıasııaǵa áserin azaıtady, — dedi ol.
Aýyl sharýashylyǵy vıse-mınıstri Erbol Tasjúrekov turaqtandyrý qorlaryn jańa ónimmen toltyrý jumystarynyń jedel qarqynmen júrgizilip jatqanyn aıtty. Onyń málimetinshe, kartop, pııaz, sábiz jáne qyryqqabat jetkizýge arnalǵan kelisimsharttar 2025–2026 jyldardyń maýsymynda halyqtyń qajettiliginiń 50 paıyzyn qamtyp otyr.
Atyraý, Almaty oblystary men Astana qalasynda pııazǵa degen suranys tolyǵymen jabylǵan. Qaraǵandy, Túrkistan, Abaı, Aqmola oblystary men Almaty qalasynda da jumys qarqyndy júrip jatyr. Al Aqtóbe oblysynda kókónistiń barlyq túri boıynsha kelisimsharttar jasasý deńgeıi tómen ekeni aıtyldy.
Serik Jumanǵarın baqylaýdy kúsheıtý úshin óńirlerge arnaıy jumys tobyn jiberýdi, turaqtandyrý qorlaryndaǵy kólem men qordyń jetkilikti bolýyn tekserýdi tapsyrdy.
