«Alǵashqy barlaý jumysy 1961 jyly júrgizildi. Ol kezde 1 tonna munaı alynǵan. Mynaý kolbadaǵy munaı sol kezde quıylyp alyndy. Odan keıin 2013 jyly «Energoresýrs» seriktestigi Novonejın aýmaǵynda barlaý jasap, jer qoınaýyndaǵy «qara altyn» qorynyń qansha tereńdikte jatqanyn anyqtady. Munaıdyń aýdanyn naqtylady. Mysaly, myna banktegi munaı 550-600 metr tereńdikten alynǵan. Alaıda bizdiń munaı óte tereńde jatyr. Oǵan jetý úshin 2 shaqyrymǵa deıin uńǵy jiberý kerek bolady. Buǵan shyǵyn kóp ketetindikten, ónimniń ózindik quny da qymbatqa shyǵady», deıdi mýzeı meńgerýshisi Vera Edigenova.
Geolog-mamandardyń aıtýynsha, Áýlıekól munaı keniniń aýmaǵy shamamen 1 254 sharshy kılometr bolady. Jerasty qabatyndaǵy 2500 metr men 3600 metr tereńdiktiń aralyǵyn mol munaı qory alyp jatyr.
Osy oraıda, Torǵaı óńirinde de mol munaı qory jatqanyn aıta ketken jón. Osydan eki aı buryn oblys ákimdiginde ótken jıynda «North Oil» seriktestiginiń basshysy Beıbit Ábıbýllaev qyrkúıekte Jangeldın aýdanyndaǵy Jylanshyq ózeniniń mańaıynda geologııalyq barlaý jumysyn bastaıtynyn aıtqan. Barlaý jumysy bir jylǵa sozylady. Eger Jylanshyqta kommersııalyq munaı men gaz qory bar ekeni anyqtalyp, ol memlekettik qor balansyna ense, tek tórt túlikpen ǵana kún kórip otyrǵan Torǵaı halqynyń da jaǵdaıy jaqsara túser me edi. Alaıda munaı, qazirshe, mýzeıde ǵana tur.
Qostanaı oblysy
