Ǵaryshqa ushpaqshy bolǵan ánshi Braıtmannyń ánderi HǴS-ta shyrqalady

ASTANA. 6 tamyz. Halyqaralyq ǵarysh stansasynyń ekıpajy ózderimen birge ánshi Sara Braıtmandy alyp ketýdiń amalyn tapty. Bul týraly informburo.kz habarlady. Jańa ekspedısııa ekıpajy halyqaralyq ǵarysh stansasyna Sara Braıtmannyń stýdııalyq albomdarynda jazylǵan daýsyn alyp ketetin boldy. Dıskterdi ekıpaj músheleri zerikkende tyńdamaqshy. Bul týraly oıyn Reseı ǵarysh agenttiginiń ǵaryshkeri Sergeı Volkov stansa jańa ekıpajynyń emtıhandyq jattyǵýynda bildirdi. Esterińizge sala keteıik, Ulybrıtanııa ánshisi Sara Braıtman Reseılik Juldyzdar qalashyǵyndaǵy ǵaryshkerlerdi daıarlaý ortalyǵynda daıyndyqtan ótken bolatyn. Alaıda, otbasylyq jaǵdaıyna baılanysty ánshi josparlanǵan ushýdan bas tartty. Nátıjesinde, onyń ornyn qazaqstandyq ǵaryshker Aıdyn Aıymbetov almastyrdy. Ekıpajdyń orbıtaǵa 2 qyrkúıek kúni «Soıýz TMA-18M» basqarylatyn ǵarysh kemesimen ushýy josparlanǵan. «Bizde eń sońǵy mınýtta ózgerister boldy. Qazir bizben birge eki bortınjener bar. Barlyǵy jaqsy, biz daıyndaldyq. Qobaljýǵa esh negiz joq», – dep atap ótti Sergeı Volkov. О́z kezeginde on kúndik ǵarysh saparynan bas tartqan Sara Braıtmannyń ornyn almastyrǵan qazaqstandyq ǵaryshker Aıdyn Aıymbetov «Ushý merziminiń tym qysqalyǵyna ókinbeısiz be?» degen suraqqa: «Azdan bastap, kóppen aıaqtaımyz», – dep jaýap berdi. HǴS-45/46/EP-18 jańa mindettegi negizgi ekıpaj quramynda Reseı ǵarysh agenttiginiń ǵaryshkeri Sergeı Volkov (halyqaralyq ǵarysh stansasyna 2008 jyly ushqan), Eýropa ǵarysh agenttiginiń astronavty Andreas Mogensen men Qazǵarysh ǵaryshkeri Aıdyn Aıymbetov bar. Elaman Qońyr. Derek: informburo.kz. Sýret: zakon.kz.