- Túrkııanyń Kappadokııa qalasynda ústel tennısinen WTT sanatyndaǵy halyqararalyq týrnırdiń shymyldyǵy túrildi. 26 memleket ókilderiniń basyn qosqan básekede elimizdiń quramasy sapynda Dastan, Aıdos Kenjeǵulovtar, Janerke Kóshkimbaeva, Eskendir Harkı, Sarvınoz Mirqadyrova, Sanjar Jubanov, Angelına Romanovskaıa, Ánel Baqyt, Baqdáýlet Ákimáli, Vladıslav Zaharov, Irısbek Artýkmetov syndy sportshylar óner kórsetedi.
- Astanada short-trekten el chempıonaty óz máresine jetti. Jarysqa 73 sportshy qatysty. Solardyń arasynan túrli qashyqtyqta Ádil Ǵalıahmetov pen Málıka Ermekova úsh, Olga Tıhonova eki márte jeńis tuǵyrynyń eń bıik satysyna kóterilse, Iаna Han, Abzal Ájiǵalıev, Nurtilek Qajyǵalı, Gleb Ivchenko bir-bir retten bas júldeni oljalady. Komandalyq saıystarda Qostanaı oblysynyń ókilderi úsh altyn oljalady, Astananyń órenderi bir jarysta aldyńǵy lekten kórindi.
- Qytaıdyń Gýııaninde quzǵa órmeleýden Álem kýboginiń kezeńdik saıysy ótti. О́kinishke qaraı, jerlesterimiz bul jarysta júldeli oryndardan kórine almady. Eń úzdik nátıjege Ámir Maımuratov qol jetkizdi. 1/8 fınalda qytaılyq Shoýhýn Chýǵa ese jibergen ol 10-oryndy qanaǵat tutty.
- 30 qyrkúıekte Almatyda fýtboldan ÝEFA Chempıondar lıgasy oıyndary aıasynda jergilikti «Qaırat» Madrıdtiń «Realyn» qabyldaıdy. Osy kezdesýde koroldik klýb qandaı quramada óner kórsetetini belgili boldy. Bas bapker Habı Alonso myna oıynshylarǵa senim artyp otyr: qaqpashylar – Tıbo Kýrtýa, Andreı Lýnın, Fran Gonsales; qorǵaýshylar – Danı Karvahal, Eder Mılıtao, Davıd Alaba, Trent Aleksander-Arnold, Raýl Asensıo, Alvaro Karreras, Fran Garsııa, Dın Heısen; jartylaı qorǵaýshylar – Djýd Bellıngem, Edýardý Kamavınga, Federıko Valverde, Orelen Chýamenı, Arda Gıýler, Danı Sebalos; shabýylshylar – Vınısıýs Jýnıor, Kılıan Mbappe, Rodrıgo, Gonsalo Garsııa, Braım Dıas, Franko Mastantýono.
- Fýtboldan keıinge shegerilgen 23-týrdyń bir oıyny ótti. Taldyqorǵannyń «Jetisýy» óz alańynda Qyzylordanyń «Qaısaryn» qabyldady. Matchtyń 11 mınýtynda Alan Chochıev aıyp dobyn sátti oryndap, jergilikti jankúıerlerdi bir qýantsa, kóp uzamaı Aıbar Jaqsylyqov tarazy basyn teńestirdi. Esep – 1:1.
- ATR reıtınginde 259-orynda turǵan elimizdiń tennısshisi Mıhaıl Kýkýshkın Fransııanyń San-Tropesinde «ATP Challenger» sanatyndaǵy týrnırdi sátti bastady. 1/16 fınalda ol úzdikter tiziminde 143-satyǵa jaıǵasqan kort qojaıyny Per Erberdi 7:5, 6:7, 7:5 esebimen eńserdi. Endi taǵy bir jergilikti oıynshy Tom Parısemen kúsh synasady.
