Mekteptiń damýyna belgili mesenat ári qoǵam qaıratkeri Kúlparshyn Aıdarhanova uıytqy bolyp otyr. Onyń bastamasy men qoldaýynyń arqasynda «Aqbobek International School» jaı ǵana mektep emes, oqýshylar óz talanttaryn ashyp, muǵalimder kásibı turǵyda únemi shyńdalyp otyratyn bilim berý ekojúıesine aınaldy.
«Ár tórt jyl saıyn áleýmettik nysandar salamyz. О́tken jyly 90 oryndyq ınternaty bar Aqbobek lıseıin turǵyzdyq. Aýdandarda jaqsy mektepte oqyǵysy keletin daryndy balalar baryn kórip, osyndaı jobaǵa bardyq», – dedi Aıdarhanova.
Bul – «Aqbobek» jelisindegi úshinshi mektep. Jalpy 400 orynǵa laıyqtalǵan, sonyń ishinde 100-i aýyldyq jerlerden kelgen balalarǵa arnalǵan.
«Internatta balalarǵa úıdegideı jaıly jaǵdaı jasaýǵa tyrystyq. Qazir osy balalardyń oqýyna memleketten qarajat bólingenin kútip otyrmyz», – dep qosty mesenat.
Kúlparshyn Aıdarhanovanyń aıtýynsha, bul mektepte oqýshylar IT-tehnologııalardy tereńdete oqyp, jasandy ıntellektini meńgerip, robototehnıkamen aınalysa alady. Aldaǵy ýaqytta mektep janynan tutas tehnopark salý da josparlanǵan. Mesenat sapaly bilimniń arqasynda aýyldan kelgen balalardyń da halyqaralyq olımpıadalarda el atynan baq synaıtynyna senim bildirdi.
«Aqtóbelik balalarǵa arnalǵan áleýmettik nysandar meniń ómirimniń eń jarqyn bóligi ekeni sózsiz. Jobalardyń naqty nátıjesin, óńir úshin mańyzyn kórgende jańa jetistikterge yntalanasyń», – dep atap ótti Aıdarhanova.
Qazirgi tańda «Aqbobek International School»-de 850 oqýshy bilim alýda. Olarmen halyqaralyq sertıfıkatqa ıe pedagogtar men kásibı olımpıada jeńimpazdary jumys isteıdi. Muǵalimder – tek qana ustaz emes, tez ózgeretin zamanda balalardyń ózin tabýyna jol kórsetetin naǵyz tálimgerler. Olar únemi damý ústinde: respýblıkalyq jáne halyqaralyq konferensııalarǵa qatysady, ǵylymı jobalar jasaıdy. 2024 jáne 2025 jyldary «Úzdik pedagog» ataǵyn alǵandary da bar.
Mektepte oqýǵa barlyq jaǵdaı jasalǵan: 66 oqý kabıneti, 5 ınformatıka synyby, 3 sheberhana, 3 sportzaly jáne zamanaýı jabdyqtalǵan synyptar bar.
2025 jylǵy 8 qyrkúıekte Memleket basshysy Qasym-Jomart Toqaev Qazaqstan halqyna Joldaýynda aldaǵy úsh jylda elimiz «sıfrlyq ultqa» aınalýy tıis ekenin atap ótti. Ol jasandy ıntellekt negizderin mektep baǵdarlamasyna engizý, sondaı-aq zamanaýı tehnologııalardy meńgergen pedagogtardy daıarlaý qajettigin aıtty.
Bul baǵyt «Aqbobek» mektepteriniń tujyrymdamasyna da sáıkes keledi. Munda bilim berý úderisi ınnovasııalyq tásilderdi, synı oılaý men fýnksıonaldyq saýattylyqty ıntegrasııalaý negizinde qurylady.
«AIS» basty maqsattarynyń biri – tabysty ári jaýapty azamattardy tárbıeleý. Bolashaqta olar óz qalasynyń, óńiriniń jáne eldiń damýyna úles qosýy tıis. Bul týraly Memleket basshysy da atap ótip, Qazaqstanda sapaly bilim men daryndy jastardy qoldaý asa mańyzdy ekenin jetkizgen.
«Munda ár oqýshyǵa jeke-jeke kóńil bólinedi. Muǵalimder balalarǵa bilimge degen súıispenshilikti zorlyqpen emes, qyzyǵýshylyqpen sińirýge tyrysady. Biz adal pedagogıka qaǵıdattaryn ustanamyz», – dedi Kúlparshyn Aıdarhanova.
Aldaǵy jospar – mektepti ary qaraı damytý, oqýshylardyń bilim qoryn nyǵaıtý, olardyń sıfrlyq daǵdylaryn jáne synı oılaý qabiletin jetildirý, ǵylymı jobalar men halyqaralyq olımpıadalarǵa qatysýǵa kóbirek múmkindik berý.
Mektep ashýdan bólek, depýtat óńirde áleýmettik mańyzy bar túrli jobalardy júzege asyryp keledi. Kúlparshyn Aıdarhanova «Aqbóbek» ońaltý ortalyǵynyń ashylýyna bastamashy bolyp, onyń fılıaldaryn aýdandarda iske qosyp, aýyl turǵyndaryna medısınalyq kómekti qoljetimdi etti. Aqtóbe oblysy «Atameken» kásipkerler palatasy Isker áıelder keńesiniń tóraıymy ári mentor retinde ol áıel-kásipkerlerdi belsendi qoldap, naýbaıhana, dúken, sulýlyq salondaryn ashýǵa kómektesip, jańa jumys oryndaryn qurýǵa jáne shaǵyn bıznesti damytýǵa yqpal etip júr.
Sonymen qatar, Aıdarhanova «Baqytty Bala» mádenı festıvalin uıymdastyrýǵa bastamashy boldy. Bul festıval daryndy balalarǵa arnalǵan halyqaralyq alańǵa aınalyp, óńirdiń bedelin elden tys jerlerge de pash etti.
