Joǵarǵy sot tóraǵasy Aslambek Merǵalıev Azamattardyń konstıtýsııalyq quqyqtaryn qamtamasyz etý jáne qorǵaý júıesindegi ákimshilik sot isin júrgizýdiń róli týraly baıandama jasady. Ol elimizdegi júrgizilgen ákimshilik reforma tıimdiligin dáleldegenin, bul baǵyttaǵy Memleket basshysynyń tapsyrmasy sátti oryndalǵanyn atap ótti.
Baıandamashy ákimshilik rásimder men sot isin júrgizý birqatar qaǵıdatqa súıenetinin, ol qaǵıdattar azamattardyń múddeler teńgerimin saqtaýǵa, álsiz taraptyń quqyqtaryn qorǵaýǵa baǵyttalǵanyn aıta kelip, keıingi bes jylda elimizdiń ákimshilik sottarynda 124 myńnan asa talap-aryz túskenin, Ákimshilik rásimdik-prosestik kodeks (ÁRPK) qabyldanǵanǵa deıin azamattar men bıznes ókilderi isterdiń nebári 15%-yn ǵana utatyn bolsa, búgingi bul kórsetkish 60%-ǵa jetkenin, bul qadam «sottar únemi memlekettik organdardy jaqtaıdy» degen teris stereotıpti ózgertýge múmkindik bergenin alǵa tartty.
– Bıylǵy naýryz aıynan bastap ákimshilik ister boıynsha aýmaqtan tys sottylyq engizildi. Ol talapkerdiń tańdaýy boıynsha júzege asady jáne jaýapkerdiń kelisimin qajet etpeıdi. Bul sheshim eń aldymen jergilikti sottardyń beıtaraptylyǵyna qatysty kúmánderdi joıýǵa ári sotqa degen senimdi arttyrýǵa baǵyttalǵan. Sonymen qatar osy jyldyń 1 shildesinen bastap jumysyn bastaǵan qylmystyq, azamattyq, ákimshilik sottardyń kassasııalyq satysynyń jumysyna erekshe nazar aýdaryldy, – dedi A.Merǵalıev.
Sonymen qatar A.Merǵalıevtiń túsindirýinshe, elimizdegi kassasııalyq shaǵymdardy qaraý tártibi biryńǵaılanǵan. Aldyn ala irikteý alynyp tastalyp, azamattardyń kassasııaǵa tikeleı júginýine qol jetkizilgen. Barlyq shaǵym sot otyrysynda taraptardyń qatysýymen alqalyq túrde qaralady. Qylmystyq jáne azamattyq isterdi kassasııalyq satyda qaraý merzimi ÁRPK-ge sáıkes alty aıdan aspaıdy. Bul rette sot sheshimderiniń oryndalý ýaqytyn sozýdy boldyrmaýǵa múmkindik beredi.
Spıker ákimshilik reforma nátıjesinde 15 myńnan asa is taraptardyń tatýlasýymen, 29 myńǵa jýyq is talap qoıýdy qaıtaryp alýmen aıaqtalǵanyn aıtty. Sondaı-aq ol Memleket basshysy ınvestısııalyq ahýaldy jáne bıznesti júrgizý jaǵdaıyn jaqsartý boıynsha tapsyrma bergenin, qazir ınvestısııalyq qyzmetke baılanysty ınvestorlardyń talap qoıýlaryn Astananyń sottary qaraıtynyn (ÁRPK-niń 102-babynyń 3-bóligi, AIJK-niń 27-babynyń 1-2-bóligi), ÁRPK qoldanysqa engizilgennen bastap Astana sottaryna osy tektes 1000-ǵa jýyq talap qoıý kelip túsip (999, onyń ishinde: MAÁS – 482, MAES – 517), elordanyń ákimshilik soty sheshimderdiń 83 paıyzy ınvestorlardyń paıdasyna sheshilgenin, aqshalaı balamamen eseptegende 100 mlrd teńgege jýyq somaǵa ınvestorlardyń quqyqtary qorǵalǵanyn málimdedi.
Sonymen qatar is-shara barysynda komıssııa janyndaǵy Saraptamalyq keńes jumysynyń tıimdiligi de qaralyp, KazGUU ýnıversıtetiniń rektory Májıt Nárikbaev, Saraptamalyq keńes tóraǵasy Sergeı Pen sóz sóıledi.
Otyrystyń qorytyndysy boıynsha tóraǵalyq etken Igor Rogov komıssııa músheleri men shaqyrylǵan sarapshylarǵa belsendi qatysqany úshin alǵys bildirip, azamattardyń quqyqtary men múddelerin qorǵaý salasyndaǵy jumysty jalǵastyrý boıynsha birqatar usynys berdi.
