Jetpis jyldyq jylnamasy bar almatylyq klýb bıyl tuńǵysh ret ÝEFA Chempıondar lıgasynyń jalpy kezeńine joldama alyp, jankúıerlerdi qýantty. Degenmen de alǵashqy joryq sátsiz boldy. Rafael Ýrazbahtın baptaıtyn «Qaırat» oıynshylary «Sportıng» fýtbolshylarynan 4:1 esebimen oısyraı utyldy. 21-mınýtta «Sportıngtiń» kapıtany Morten Iýlmannyń penaltıin «Qaırattyń» 18 jastaǵy qaqpashysy Sherhan Qalmyrza qaıtardy. Almatylyq klýbtyń negizgi qaqpashylary Aleksandr Zarýskıı de, Temirlan Anarbekov te jaraqat alyp, bul oıynǵa qatysqan joq. Jalpy, almatylyq klýbtyń qorǵanysy alań ıeleriniń qysymyna 1-taımnyń 43-mınýtyna deıin shydas berdi. Sherhan Qalmyrza qaqpaǵa týra baǵyttalǵan birneshe joıqyn soqqyny toıtardy. Biraq basymdyqty ýysynan shyǵarmaǵan «Sportıng» oıynshylary 44-mınýtta esep ashyp, Fransıshký Trınkan enshisine gol jazdy.
Ekinshi taımda bizdiń jigitterdiń shaldyǵyp qalǵany tipti anyq baıqaldy. Lıssabondyq klýbtyń bas bapkeri Rýı Borges 61-mınýtta úsh birdeı oıynshysyn alańǵa shyǵardy. Osydan keıin-aq oıynnyń baǵyty ózgerip sala berdi. Trınkan 64-mınýtta esepti eselep, dýbl jasasa, 66-mınýtta Alısson Santos, 68-mınýtta Jeovanı Kenda gol soqty. «Qaırat» sapynan 86-mınýtta Edmılson Rıkardıno esep aıyrmasyn qysqartty.
«Jalpy kezeńdegi betashar matchtaǵy jeńilis janymyzǵa batady. Qatelikke jıi uryndyq, bizdiń jigitterde de gol soǵatyn múmkindik boldy. Oıynnan qorytyndy shyǵaryp, komandany kúsheıtýge tyrysamyz», dedi R.Ýrazbahtın.
«Qaırat» fýtbolshylary Chempıondar lıgasynyń jalpy kezeńindegi ekinshi matchyn óz alańynda ótkizedi. 30 qyrkúıekte Almatynyń «Ortalyq stadıonynda» Ispanııanyń ataqty «Real Madrıd» klýbyn qabyldaıdy.
