12 qazan kúni semeılikter qala ákimi saılaýynda óz tańdaýyn jasaıtyn bolady. Bul – elimizdegi qala ákimderi tikeleı saılanatyn alǵashqy saılaý. Bastapqyda saılaýǵa qatysýǵa segiz kandıdat nıet bildirgen bolatyn. Alaıda, úsh úmitker Memlekettik qyzmet isteri agenttiginiń Abaı oblysy boıynsha departamentiniń talaptaryna saı emes bolyp shyqty. Al taǵy bir kandıdat óz erkimen kandıdatýrasynan bas tartypty dep estidik.
– Bul elimizde tuńǵysh ret ótkizilip jatqan oblys ortalyǵyndaǵy qala ákiminiń saılaýy. Byltyr eki aýdan – Kýrchatov qalasynda jáne Abaı aýdanynda synaq joba retinde aýdan ákimderin saılaý naýqany ótken. Biraq 2025 jyly 1 qańtardan bastap bul zań kúshine enip, tunǵysh ret oblys ortalyǵynda saılaý ótkizilip otyr. Basqa eshqandaı erekshelik joq, algorıtmi barlyq saılaýlarmen birdeı, – deıdi Semeı qalasynyń aýmaqtyq saılaý komıssııasynyń tóraıymy Gúljan Qýanysheva.
Osylaısha, aýmaqtyq saılaý komıssııasyna tórt úmitker tirkeldi. Olar Aıbolat Bekjasarov, Ádilet Qojanbaev, Qýanysh Tóleýov, Qanat Shapatov. Kandıdattary qysqasha tanystyra ketsek, 1. Shapatov Qanat Muratuly – Balalar men jastardyń shyǵarmashylyq saraıy dırektory (1971 jyly týǵan, Semeı qalasynda turady); 2. Tóleýov Qanysh Maqsutuly – Geodezııa, kartografııa jáne qurylys joǵary kolledjiniń dırektory (1972 jyly týǵan, Semeı qalasynda turady); 3. Bekjasarov Aıbolat Qaırkeshuly – ýaqytsha jumyssyz (1963 jyly týǵan, Semeı qalasynda turady); 4. Qojanbaev Ádilet Nursaǵatuly – Kókpekti aýdanynyń ákimi (1980 jyly týǵan, Kókpekti aýylynda turady). Sonymen tirkelgen kandıdattarǵa óz baǵdarlamalaryn saılaýshylarǵa tanystyrý úshin 11 qazan, túngi saǵat 12:00-ge deıin ýaqyt berildi. 11 qazan kúni kez kelgen úgit-nasıhatqa tyıym salynady.
– 16 qyrkúıekten 18:01-den osy 4 kandıdat úgit-nasıhat jumystaryn bastaı berýge quqyly. Úgit-nasıhat, kezdesý oryndary barlyǵy qala ákimdiginiń saıtynda kórsetilgen. Árbir kandıdattyń óziniń shtaby jumys isteıdi. Sol shtab qalaı jumys isteıdi, úgit-nasıhat solaı júredi, – dedi G. Qýanysheva.
Saılaý kúni Semeı qalasynda 128 saılaý bólimshesi jumys isteıdi. Onyń 110-y ashyq, 18-i jabyq. Qazir osy ýchaskelerde daıyndyq jumystary júrilip jatyr. Saılaýǵa shamamen 220 myń saılaýshy qatysady eken.
Abaı obylsy
