Sársen Amanjolov atyndaǵy Shyǵys Qazaqstan ýnıversıtetiniń zertteýshileriniń ázirlemesi topyraq pen daqyldardyń kórsetkishterin joǵary dáldikpen anyqtap, aýyl sharýashylyǵyn tek tehnologııalyq qana emes, sonymen qatar ekonomıkalyq turǵydan tıimdi basqarýǵa jol ashady.
S.Amanjolov atyndaǵy ShQÝ ǵylymı qyzmetkeri Almasbek Maýlıt joba jóninde: «Bizdiń jobanyń negizinde mýltıspektraldy kameramen jabdyqtalǵan dron jatyr. Ol birden bes spektrde túsirilim júrgizedi: qyzyl, kók, jasyl, jaqyn jáne ortasha ınfraqyzyl. Mundaı ádis adam kózine kórinbeıtindi «kórýge» múmkindik beredi: topyraqtaǵy ylǵal deńgeıi, hlorofıll mólsheri, ósimdikterdiń aýrý belgileri nemese jerdiń tozýy. Alynǵan beınelerdi jasandy ıntellekt taldaıdy. Algorıtm daqyldar men aramshópterdi ajyratyp, olardyń taralýyn anyqtaıdy, tipti avtomatty túrde zaqymdanǵan aýmaqtardyń kartasyn jasaıdy. Bul fermerlerge jedel áreket etýge jaǵdaı jasaıdy – máseleni jergilikti deńgeıde sheshý, egis aınalymyn josparlaý nemese ósirý tehnologııasyn túzetý múmkindigi paıda bolady», dep pikir bildirdi.
Jobanyń qoldanystaǵy paıdasy aıqyn. Júıe tyńaıtqyshtar men ósimdikti qorǵaý quraldaryn únemdi paıdalanýǵa, shyǵyndy azaıtýǵa, problemaly aýmaqtardy erte anyqtap ónim joǵaltýdy qysqartýǵa, tabystylyqty arttyrýǵa, sondaı-aq ınvestorlar men memlekettik organdar úshin jerdiń ádil baǵasyn berýge kómektesedi. Osylaısha, ýnıversıtettik ázirlemeniń negizinde árbir sharýashylyq óz alqabynyń «densaýlyq kartasyn» jasaı alady.
