Eki kún qatarynan Arbat alańynda ótken aıshyqty jármeńkege bas-aıaǵy qyryq myńnan astam adam jınaldy. Bul óz kezeginde kitaptyń – tek bilim quraly ǵana emes, adamdardy jaqyndastyratyn, oıdy tereńdetetin, mádenıetti órkendetetin kúsh ekenin taǵy bir márte kórsetti. Shabyt pen shyǵarmashylyq saltanat qurǵan merekede qalamgerler men oqyrmandar arasynda jandy dıalog ornady. Bıgeldi Ǵabdýllın, Sáýle Dosjan, Aqberen Elgezek, Baqyt Bedelhan, Sanjar Kerimbaı, Maqsat Málik, Erlan Júnis, Natalıa Gorıacheva, Lıýdmıla Lazareva, Vasılıı Shýpeıkın syndy tanymal avtorlar oqyrmanmen kezdesý ótkizip, shyǵarmashylyq tájirıbesimen bólisti.
Bıylǵy festıvaldyń aýqymy keń. «Jandy kitaphana» jobasynda Abaıdan bastap Shekspırge deıingi klassıkter «tirilip», akterler beınesinde kórermenmen suhbat qurdy. Kishkentaı oqyrmandar úshin qııal-ǵajaıyp dekorasııalar men ádebı kvestter uıymdastyrylǵan «Estelik zone» aımaǵy kitap merekesiniń mańyzyn arttyrdy.
Is-sharada «Kitapashar» dep atalǵan erekshe aıdar kópshilik kóńilinen shyqty. Munda býkınıstik dúken oqyrmandarǵa kitapty muqabasy nemese annotasııasyna qarap emes, ózge oqyrmandardyń áserleri arqyly tańdaýǵa múmkindik berdi.
«Sıfrly ǵasyrda álem aqparat aǵynyna batyp barady. Áleýmettik jeli, qysqa beınerolıkter men ústirt kontentter adamnyń nazary men ýaqytyn ıemdenip aldy. Zertteýlerge súıensek, keıingi on jylda uzaq mátin oqýǵa degen shydamdylyq kúrt tómendegen. Biraq bul kitaptyń máni joǵaldy degen sóz emes. Kerisinshe, rýhanı ashtyq artqan saıyn adam balasy qaıtadan kitapqa bet burady. Kitap – adamdy adastyrmaıtyn shamshyraq. Oqyǵan adam – oıly adam. Al
oıly qoǵam – órkenıetti qoǵam. Sondyqtan sıfrlyq dáýirde kitaptyń qadirin arttyrý – árqaısymyzdyń boryshymyz», deıdi M.Áýezov atyndaǵy Ádebıet jáne óner ınstıtýtynyń ǵylymı qyzmetkeri Erǵanat Qýatbekuly.
Kitap merekesinde oqý mádenıetin erte jastan qalyptastyrý, kitapty jańa formatta nasıhattaý, kitaphanalardy jańǵyrtý máselesi de saralandy. Ásirese «Kitapfest», «Oqy jáne bólis», «Bir aıda – bir kitap» sekildi jobalar kitapty trendke aınaldyra alatyny, Tik Tok, Instagram tárizdi tanymal alańdar arqyly mazmundy shyǵarmalardy nasıhattaý, belgili tulǵalardyń kitap týraly oı bólisýi kitap oqý mádenıetin jandandyrýǵa ońtaıly áser etetini aıtyldy.
ALMATY
