Foto: Ashyq derekkóz
Onyń aıtýynsha, qazir elimizde aldaǵy kúzgi-qysqy kezeńge daıyndyq jumystary aıaqtalýǵa jaqyn. Pavlodar oblysynda jylytý maýsymy áldeqashan bastalyp ketken. Aldaǵy kúnderi soltústik aımaqtarda – Soltústik Qazaqstan, Qaraǵandy jáne Aqmola oblystarynda jylý berý jumystary jolǵa qoıylady. Qalǵan óńirlerde turǵyn úıler men áleýmettik nysandarǵa jylý aýa raıynyń salqyndaýyna qaraı belgilengen merzimde beriledi.
«Elektr stansııalarynyń daıyndyǵyna keler bolsaq, aldaǵy jylytý maýsymyna daıyndyq aıasynda júıelik operator bekitken kestege sáıkes 10 energoblokqa, 63 qazandyqqa, 39 týrbınaǵa jóndeý jumystary josparlanǵan. Búgingi tańda 6 energoblok, 29 qazandyq jáne 16 týrbınaǵa jóndeý jumystary aıaqtaldy», dedi Ertaev.
Sonymen qatar elektr jelileri men ınfraqurylym da retke keltirilip jatyr. Barlyǵy 17 myń shaqyrym jeli men 420 qosalqy stansııany jóndeý josparlanǵan bolsa, búgingi kúnge deıin 16 myń shaqyrymnan astam elektr jelisi (jyldyq jospardyń 94%-y) jáne 373 qosalqy stansııa (89%-y) jańartylǵan. Barlyq jumystar bekitilgen kestege sáıkes júrgizilip jatyr.
Erjan Ertaev atap ótkendeı, Komıtettiń aýmaqtyq departamentteri apta saıyn óńirlerge shyǵyp, energetıkalyq kásiporyndardaǵy daıyndyq barysyna turaqty túrde baqylaý jasap keledi.
