Bapkerdiń aıtýynsha, jankúıerler ǵana emes, ózderin búkil el qoldaıtynyn komanda biledi. Bul fýtbolshylarǵa kúsh-qýat berip, jeńiske jetelemek.
«Biz jankúıerlerdiń úmitin aqtaýǵa tyrysamyz. Biz laıyqty óner kórsetýimiz kerek. Qazir kesip-piship eshteńe aıtqym kelmeıdi, jaqsy oıyn kórsetýimiz kerek ne bolsa da. Mundaıda «Qaırattyń» jankúıerleri ǵana emes, búkil Qazaqstan birigedi dep oılaımyn. Biz bul qoldaýdy Chempıondar lıgasyndaǵy matchtarda-aq sezdik», dep oı bólisti Rafael Ýrazbahtın.
Mbappe, Vınısıýs nemese Bellıngem sııaqty ataǵy jer jarǵan myqtylardyń mysy baspaı ma degen suraqqa bapker bylaı dep jaýap berdi:
«Ol jaqta da osyndaı adamdar oınaıdy. Olar 7–8 kúnde úsh match oınap, uzaq saparǵa shyǵady, bilemiz olardyń aýyr kestesin. Munyń shet jaǵasyn ózimiz de sezindik. Árıne, mundaı oıynshylardyń kelýi — bizdiń jigitterdi yntalandyratyny sózsiz. Olarmen salystyryp, ózimizdi de shyńdaı túsemiz, sabaq alamyz sosyn osy oıynnan», deıdi bapker.
Rafael Ýrazbahtın «Realmen» matchqa arnalǵan naqty quram áli anyqtalmaǵanyn, ol oıynshylardyń daıyndyǵy men psıhologııalyq jaǵdaıyna baılanysty jaqyn kúnderi anyq bolyp qalatynyn aıtty.
«Biz quramnyń qandaı bolaryn boljap aıta almaımyz, sebebi neshe túrli nárse bolýy múmkin: jaraqat alady bireý, aýyryp qalady degendeı. Biz oıynshylardyń kóńil-kúıine qaraı jumys isteımiz», deıdi bapker.
Komandanyń negizgi qaqpashysy Temirlan Anarbekovtiń jaraqaty da sóz boldy. Bapkerdiń aıtýynsha, onyń jaǵdaıy jaqsaryp kele jatyr.
«Temirlan aýrýhanadan shyǵyp, bazaǵa kelip júr. Qazir gıpspen júr, gıpsti sheshken soń, kóp uzamaı jattyǵýǵa shyǵa bastaıdy», dedi Ýrazbahtın.
Qazirgi tańda negizgi qaqpashy — Sherhan Qalmurza. Sonymen qatar, quramda aldaǵy kúnderi jattyǵýǵa kirisetin Aleksandr Zarýskıı de bar. Bapker match boıy tek qorǵanyspen shektelip qalmaıtyndaryn atap ótti.
«Mundaı qarsylaspen kezdeskende birden shabýylǵa shyǵyp nemese qorǵanyp qana otyra berýge de bolmaıdy. Balans bolýy tıis. Árıne, olarda sheberligi joǵary oıynshylar bar. Biraq biz qorǵanyp qana otyrýdy josparlap otyrǵan joqpyz. Shabýyl men qorǵanystyń arasyndaǵy tepe-teńdikti saqtaýǵa tyrysamyz. Ony Sportıngpen» ótken matchtyń ekinshi taımyndaǵy 15 mınýtta kórsettik dep oılaımyn», dep túsindirdi bapker.
Portýgalııalyq «Sportıngpen» ótken oıynnan keıin bapkerlik shtab biraz oı túıip, sharshaý men klımatqa beıimdelý komandaǵa edáýir áser etetinin baıqapty. Dál osyndaı jaǵdaıǵa «Real» da tap bolýy múmkin.
«90 mınýt boıy esil-dertiń alańda bolýy úshin sergek bolý kerek. Qazir biz óz alańymyzda oınaımyz, «Jetisýmen» kezdesýdi keıinge shegerdik. Qalypqa kelip, daıyndalyp alýymyzǵa segiz kúndeı ýaqyt bar», deıdi Ýrazbahtın.
Rafael Ýrazbahtın Lıga chempıondaryndaǵy oıyndarda sheberlik qana emes, komandalyq rýh, ynta men jankeshtilik te kerek ekenine toqtaldy:
«Iá, bizde 50 mıllıon eýro turatyn fýtbolshylar joq. Biraq bizde tártip, rýh pen jeńiske degen jiger bar. Biz osylaı oınamaqpyz. Bul matchtyń ózi — erekshe. «Real Madrıd» — Chempıondar lıgasynda eń kóp tıtýl jeńip alǵan klýb. Sondyqtan biz buǵan erekshe daıyndaldyq. Bul múldem basqa deńgeı, basqa atmosfera. Barlyǵy bar kúshin salyp oınaıdy endi», dedi ol.
Komandanyń kapıtany Ádilet Sadybekov «Realmen» kezdesý — bul synaq qana emes, sonymen qatar ósip-ónýge de úlken múmkindik ekenin aıtady.
«Qobaljısyń, óıtkeni mundaı kezdesý jıi bola bermeıdi ǵoı. Biraq oıynnyń bizde ótip jatqany jaqsy boldy. Bul sporttyń damýyna yqpal etýi tıis. Qazir daıynalyp jatyrmyz. Biz el namysyn qorǵap, jankúıerlerdiń úmitin aqtaýǵa tyrysamyz osy joly», dep aǵynan jaryldy komanda kapıtany.
