«Otyrystyń kún tártibine qoıylyp otyrǵan másele – Qostanaı oblysyndaǵy óńirlik ǵylymdy damytýdy shıkizat óńdeý men aımaq ekonomıkasynyń turaqty damýyn qamtamasyz etý máselelerimen úılestire otyryp qaraý. Bul túıtkilder kún tártibine kezdeısoq qoıylǵan joq. Sebebi olar qazir eń ózekti máselelerdiń birine aınalyp otyr. О́ńirde óńdeý salasynda qosymsha qun qalyptastyrýdyń paıdalanylmaǵan zor áleýeti bar. Bul óndiris tıimdiligin odan ári arttyrýǵa jáne júıeli negizde ımportty almastyrý máselesin sheshýge múmkindik beredi. Memleket basshysy osy máselege erekshe nazar aýdaryp, úsh jyl ishinde agroónerkásip keshenindegi (AО́K) óńdelgen ónim úlesin 70%-ǵa deıin arttyrý mindetin qoıdy. Qostanaı oblysy – aýyl sharýashylyǵy jer kólemi 10 mln gektardan asatyn, elimizdegi eń iri agrarlyq óńirlerdiń biri jáne eleýli ındýstrııalyq áleýetke ıe. О́ńirdiń ornyqty damýy ǵylymı turǵydan negizdelgen sheshimderdi, klımattyq táýekelderge beıimdelýdi, resýrstardy utymdy paıdalanýdy, emıssııany azaıtýdy jáne ekologııalyq tehnologııalardy engizýdi qajet etedi», dedi Prezıdent janyndaǵy UǴA prezıdenti Aqylbek Kúrishbaev.
Akademııa óńirdi damytýǵa baǵyttalǵan birqatar sheshimdi usyndy. Máselen, óńirde ǵylymı-ınnovasııalyq qor qurylyp, oblystyń naqty qajetine negizdelgen ǵylymı zertteýlerdi maqsatty qarjylandyrý tetigi engiziledi. Osy oraıda basym ǵylymı baǵyttardy oblys ákimdigi akademııamen birlese belgileıdi. Osylaısha, óndiristik sıkldiń barlyq kezeńi – jańa sorttar men tuqymdardy shyǵarýdan bastap, tereń óńdeýdiń keshendi tehnologııalary men tıimdi basqarý sheshimderin engizýge deıin ǵylymı-tehnologııalyq turǵydan súıemeldenedi.
Oblys ákimi Qumar Aqsaqalovtyń aıtýynsha, AО́K salasynda kelesi jyldan bastap 12 jańa sút-taýar fermasy paıdalanýǵa beriledi. О́ńir basshylyǵy ónimdi qaıta óńdeýge, ishki naryqqa shyǵarýǵa, jańa jumys oryndaryn qurýǵa ekpin qoımaq.
Kóshpeli otyrys aıasynda ǵylymı-ınnovasııalyq kórme uıymdastyrylyp, shetelden, ortalyqtan kelgen jáne jergilikti ǵalymdardyń, bıznes pen memlekettik qyzmet ókilderiniń qatysýymen forsaıt-sessııa ótti. Qatysýshylar ǵylymı qaýymdastyq pen ónerkásip arasyndaǵy ózara is-qımyldyń múmkindikterin talqylady.
Qostanaı oblysy
