Ǵasyrda sırek týatyn tulǵanyń ulttyq ónerimizdiń damýyna qosqan eńbegi – ólsheýsiz. Qazaqtyń qasıetti dombyrasynyń únin jalpaq álemge tyńdatty. «Otyrar sazy» folklorlyq-etnografııalyq orkestrin quryp, halqymyzdyń rýhanı baı qazynasyn dúnıe júzine málim etti. Birtýar tulǵanyń ǵasyrlyq toıy – elimizge ǵana emes, álemge ortaq oqıǵa. Sondyqtan bul data IýNESKO-nyń halyqaralyq deńgeıde atalyp ótetin mereıtoılar tizimine endi.
Mazmundy is-sharaǵa Mádenıet jáne aqparat mınıstri Aıda Balaeva, dıplomatııalyq korpýs pen shyǵarmashylyq zııaly qaýym ókilderi qatysty. Aıda Ǵalymqyzy quttyqtaý sózinde qazaq mýzykasy men óneriniń IýNESKO aıasynda laıyqty baǵalanýy – memleketimiz úshin úlken mártebe ekenin jetkizdi.
«Parıj tórinde, IýNESKO-nyń mártebeli shtab-páterinde qazaq halqynyń uly kompozıtory Nurǵısa Tilendıevtiń 100 jyldyǵy joǵary deńgeıde toılanyp otyr. Nurǵısa Tilendıevtiń shyǵarmalary – qazaq halqynyń rýhanı álemin pash etýmen qatar, jalpyadamzattyq qundylyqtardy dáripteıtin bıik óner týyndylary», dedi mınıstr.
Is-sharanyń maqsaty – ulttyq mádenı muramyzdyń baılyǵy men san ǵasyrlyq dástúrli mádenıetin álemge nasıhattaý.
IýNESKO sahnasynda kompozıtordyń ǵajaıyp týyndylary saltanat qurdy. Ony kórnekti tulǵa ózi qurǵan «Otyrar sazy» orkestri oryndady. Búginde ujymnyń kórkemdik jetekshisi ári dırıjeri, kompozıtordyń qyzy Dinzýhra Tilendıeva. Sondaı-aq konsertte elimizge tanymal ónerpazdar: Svetlana Aıtbaeva, Álisher Kárimov, Farhat Kýbıev, Gaýhar Jumaǵulova, Asqar Muqııat, Abaı Qoıshybaev, Rasýl Jarmambetov, Nurǵalym Amanbaı, Aıagóz Haırýllına, Juldyz Baıjuma óner kórsetti. Tyńdarmandar qazaq áni men kúıiniń syrly sazyna elitip, tamasha áserge bólendi.
О́reli talant ıesi mýzykanyń barlyq janryn kásibı meńgergen. Onyń kúıshiligi, dombyrashylyǵy, kompozıtorlyǵy, dırıjerligi – bir-bir álem. О́ner sheberi kózi tirisinde 500-den astam mýzykalyq shyǵarma týdyrdy. 50-den astam dramalyq qoıylym men jıyrmaǵa jýyq otandyq kórkem fılmniń mýzykasyn jazdy. Sonymen birge kompozıtordyń halyq júreginen jol tapqan ánderin jurtshylyq áli kúnge deıin súıip tyńdaıdy. Onyń shyǵarmalarynda erkin tógilgen ásem áýen men názik lırızm ǵajap úılesim tapqan.
Ásirese aıtýly tulǵanyń ózi qurǵan «Otyrar sazy» folklorlyq-etnografııalyq orkestriniń orny bólek. Mundaǵy qos ishekti, úsh ishekti dombyra, qobyz, sybyzǵy, sazsyrnaı, jetigen, shańqobyz, asataıaq sekildi qanshama ulttyq mýzykalyq aspaptardyń oryndaýyndaǵy shyǵarmalar ulttyq naqyshymen erekshelenedi. О́ner ujymynyń repertýaryna halyq kúılerimen birge zamanaýı qazaq kompozıtorlarynyń shyǵarmalary da engen. Orkestr 1985 jyly Máskeýdiń P.I.Chaıkovskıı atyndaǵy Úlken konsert zalynda ótken shyǵarmashylyq konsertte joǵary kásibı oryndaýshylyq sheberligin tanytyp, ónersúıer qaýymnan joǵary baǵa aldy.
Nurǵısa Tilendıev – kózi tirisinde halyqtyń aıryqsha qurmetine ıe boldy. Onyń esimin barsha qazaq bildi. Qadir tutty. Bul – barlyq talantqa buıyra bermeıtin baqyt.
