Memleket tarapynan kásipkerlerge jeńildikter men qoldaýlar kórsetilý arqasynda bul kúnde jeke isin ashýǵa múmkindikterdi utymdy paıdalana alýshylardyń az emestigi iskerliktiń ósýin tanytarlyq qubylys sanalsa, osy oraıda Jańaarqa aýdany bıznesmenderi belsendiligi jyldan-jylǵa kúsheıip otyrýyn aıtýǵa bolady. Máselen, olardyń «Bıznestiń jol kartasy-2020» baǵdarlamasy aıasynda beriletin qaıtarymsyz grantty óz sharýalaryn damytý úshin utymdy qoldana bilýge umtylystary sony dáleldeıdi. Atalǵan granttyq qarajatty alýǵa konkýrsqa qatysyp, odan qoldaý tabý boıynsha kásiporyndarǵa ınnovasııa baǵytyndaǵy erekshelikterine jáne jańashyl jobalarǵa qaıtarymsyz negizde, sondaı-aq, kepilzatsyz berilýi óndiris órisin jaıdyrýǵa qolaıly jaǵdaı týǵyzýda. Sony iske asyrýshylardyń biri Kúlshat Amanqulova jetekshilik etetin «Polısıtrol» JShS-nyń betondy kirpishterdi óndirý kólemin birshama keńeıtýi kásiporynǵa da, jergilikti tutynýshylarǵa da jaqsy qadam boldy.
Osy maqsattaǵy jobalary qoldaý taýyp, 3 mıllıon teńge qaıtarymsyz grantyna ıe bolǵan seriktestik aýdan ortalyǵynda qurylysqa óte qajetti ónimder shyǵaratyn kásiporyn jumysyn jolǵa qoıdy. Onyń paıdasy buryn bul qurylystyq materıaldy alystan tasymaldap, artyq shyǵyndalýǵa tap bolyp otyr. Bir jaǵynan kirpishtiń baǵasy tıimdi ári sýyq ótkizbeıdi. Sondyqtan, suranys úlken. Soǵan sáıkes kúnine 14-16 tekshe metrge deıin kirpish shyǵarý kólemi odan saıyn óse túsip jatyr.
Jeke isti dóńgeletýde Kúlshat Amanqulova qurbysyndaı Maıra Qyrbasovanyń da qadamy qutty. «Saýyqtyrý ortalyǵyn» ashý maqsatynda 7 paıyzdyq jeńildikpen 12 mıllıon 500 myń teńge nesıe alynyp, tis emdeýdiń barlyq qyzmetterin kórsetetin orynnyń qurylysy aıaqtalyp qaldy. «Munymen birge munda aýyldyq jerdegi birinshi sán salony jumys istemek. Turmys jaqsarǵan, talǵam ósken zamanda jerlesterimizdiń bet-álpet, dene kútimine degen tilekterin qalaısha eskermes emespiz», deıdi ol. Aýdannyń bıznes salasyndaǵy jaǵymdy jańalyqtardyń taǵy biri «Jańaarqa MTS» jobasy iske asyrylýy ekenin aıtpaı ótpeske bolmaıdy. «QazAgro» ulttyq basqarý holdınginiń qoldaýy jáne «Qazagroqarjy» AQ kómegimen qurylǵan bul kásiporyn mal azyǵyn daıyndaý, azyqtyq daqyldar óndirý, kóktemgi dala jáne kúzgi jıyn-terim jumystaryn júrgizýge qyzmet túrlerin kórsetýmen shuǵyldanady. Eskene aýylynda ornalasqan mashına-traktor stansasy aınalasyndaǵy sharýa qojalyqtarynyń 3200 gektar jerin óńdeýdi, 1900 gektarǵa ártúrli daqyldar men kópjyldyq shópter egýdi, 1000 gektar tanapty gerbısıdpen ýlaýdy, 1000 gektarǵa tyńaıtqysh shashýdy bastap ketti. Bular osy keıingi kezde jańadan jarasym tapqan ister. Ýaqyt talabynan qalmaýǵa saq, ozyq úrdisterdi óristetýge qushtar jańaarqalyqtar bul jaǵynan árdaıym alda.
Aıqyn NESIPBAI, jýrnalıst.
Qaraǵandy oblysy, Jańaarqa aýdany.
