Foto: gov.kz
Qurmetti qonaqtar qatarynda QR Prezıdenti janyndaǵy Áıelder isteri jáne otbasylyq-demografııalyq saıasat jónindegi ulttyq komıssııanyń tóraǵasy, QR Mádenıet jáne aqparat mınıstri Aıda Balaeva, Qyrǵyz Respýblıkasynyń Ekonomıka jáne kommersııa mınıstriniń orynbasary Gúlshat Asylbaeva, Ázerbaıjan Respýblıkasynyń Mıllı Medjlısi janyndaǵy Otbasy, áıelder jáne balalar isteri jónindegi komıtetiniń tóraǵasy Idjran Gýseınova, О́zbekstan Respýblıkasy Prezıdenti janyndaǵy Strategııalyq reformalar agenttiginiń Nátıjelerge qol jetkizý keńsesiniń jetekshisi Azıza Ýmarova, Koreıa Respýblıkasynyń Saýda jáne ónerkásip salasyndaǵy áıelder halyqaralyq federasııasynyń prezıdenti Sofı Kang jáne basqa da bedeldi tulǵalar boldy.
«Búginde qazaqstandyq qoǵamnyń damý baǵyttary aıqyn. Memleket basshysy Qazaqstannyń jańa ıdeologııalyq tuǵyryn qalyptastyrdy. Ol uzaq merzimdi tujyrymdamalarǵa negizdelgen. Atap aıtsaq, «Zań men Tártip», «Taza Qazaqstan», «Adal Azamat» bastamalary. Osy tujyrymdamalardy júzege asyrýda bizge – kóshbasshy áıelderge, qundylyqtardy saqtap urpaqta-urpaqqa jetkizetin analarǵa jaýapkershilik júkteldi. Biz jas urpaqqa ishki mádenıet pen zańǵa baǵynýdy, damýǵa umtylýdy, eńbekqor jáne jaýapty azamat bolýdy, óz mádenıeti men dástúrine uqypty qaraýdy, tabıǵatty súıý men adamı qadir-qasıetti qasterleýdi, birlik pen toleranttylyq qundylyqtaryn dáriptep, sińirýimiz kerek», dedi Aıda Balaeva.
Ulttyq komıssııa tóraǵasynyń aıtýynsha, Qazaqstan áıel quqyqtaryn qorǵaý kórsetkishteri boıynsha álemniń birqatar elinen alda tur. Degenmen, genderlik teńdik pen áıelder kásipkerligin damytý máseleleri áli de ózekti.
«Búginde Qazaqstanda otbasylyq-turmystyq qatynastar salasynda progressıvti zańdar qabyldandy. Zańnamalyq deńgeıde harassment qylmystyq jaýapkershilikke tartylatyn bolady. Turmystyq zorlyq-zombylyq úshin tek jaýapkershilik kúsheıtilip qana qoımaı, qoǵamnyń narazylyǵyn týdyryp, uıat sanalatyn qubylysqa aınaldy. Qalyńdyqty urlaý da qatań jazalanatyn qylmysqa endi, ol úshin on jylǵa deıin bas bostandyǵynan aıyrý jazasy qarastyrylǵan», dedi mınıstr.
Aıda Balaev sózin qorytyndylaı kele forýmǵa qatysýshylardyń jumysyna tabys, bastamalaryna sáttilik tiledi.
Bıylǵy «BeWoman Asia» forýmy «Transformasııa. Tulǵa. Otbasy. Qoǵam. Bolashaq. Kóshbasshylyq. Shabyt. Birlik» uranymen ótti. Forým aıasynda sıfrlandyrý, jasandy ıntellekt, bıznes jáne otbasy ınstıtýtynyń qundylyqtary sııaqty keń aýqymdy máseleler talqylandy. Spıkerler qatarynda halyqaralyq jáne qazaqstandyq kásipkerler, zertteýshiler, jýrnalıster men ınflıýenserler de boldy.
