Jyl boıy Evneı Arystanulynyń 100 jyldyǵyna arnalǵan túrli sharalar uıymdastyryldy. Sonyń ishinde AQSh-taǵy Djordj Vashıngton ýnıversıtetinde ótken Bóketov kúni erekshe oryn aldy. Al Qaraǵandydaǵy konferensııa osy aýqymdy baǵdarlamaǵa qorytyndy boldy.
Konferensııa bastalar aldynda oblys ákimi men qonaqtar akademık Bóketovtyń eskertkishine gúl shoktaryn qoıdy.
Memleket basshysy Qasym-Jomart Toqaevtyń quttyqtaý hatyn konferensııa qatysýshylaryna Qaraǵandy oblysynyń ákimi Ermaǵanbet Bólekpaev jetkizdi. Prezıdent forýmnyń ashylýymen quttyqtap, Evneı Bóketovtyń 100 jyldyǵyna arnalǵan halyqaralyq jıynda ǵalymnyń esimin máńgi este qaldyrýǵa jáne onyń baı murasyn saqtaýǵa qatysty mazmundy oılar men usynystar aıtylatynyna senim bildirdi.
«Osy oqý ornynyń túlegi retinde mundaı mańyzdy sharaǵa qatysyp otyrǵanyma qýanyshtymyn. Shyn máninde aýqymdy oılaıtyn tulǵa negizin qalaǵan ýnıversıtettiń bolashaqqa senimmen qaraıtynyn kórý – erekshe sezim. Bul murany saqtap, damytýǵa atsalysyńyzdar. Bilimge degen qushtarlyqtaryńyz sarqylmasyn, árqashan jandaryńyzdan qoldaý kórsetip, shabyt beretin jandar tabylsyn!», dedi Ermaǵanbet Bólekpaev.
Forým jumysyna Senat pen Májilis depýtattary, Qazaqstan halqy Assambleıasynyń ókilderi, elimizdiń jetekshi joǵary oqý oryndarynyń ǵalymdary men rektorlary, sondaı-aq sheteldik qonaqtar qatysty.
Ǵalymnyń qyzy Aqsulý Bóketova ákesin eske alyp, estelikterimen bólisti:
«Evneı Arystanuly Hımııa-metallýrgııa ınstıtýtyn basqarǵan kezde janynan bir top úzeńgilesterin jınady. Onyń kóptegen shákirtteri uzaq ǵumyr keship, ǵylymı áleýetin arttyrdy, biraq bári ony umytpaı, qurmetpen eske alady. Tańǵalarlyǵy, ol 1972 jyly tańdaǵan kadrlar áli kúnge deıin osy jerde eńbek etýde. Ákem tek ǵalym ǵana emes, meıirimdi áke de boldy. О́mirdiń eń kúrdeli sátterinde de ázil-qaljyńynan aınyǵan emes. Búgingi konferensııanyń árbir qatysýshysy óz ıdeıalaryn damytý úshin qýatty serpin alsyn dep tileımin», dedi Aqsulý Bóketova.
Konferensııa barysynda akademık týraly kóptegen jyly sózder aıtyldy.
«Ata-babamyz árdaıym bilim men ǵylym – qoǵamnyń qozǵaýshy kúshi dep sanaǵan. Osyndaı iz qaldyrǵan tulǵa qurmetke laıyq. Onyń ǵylymı jańalyqtary men ómirlik ustanymy jastardy tárbıeleýde, ásirese esimi berilgen ýnıversıtet stýdentteri úshin, úlken úlgi bolyp qala bermek», dedi Májilis depýtaty Qudaıbergen Beksultanov.
Plenarlyq otyrysta Evneı Bóketovtyń jeti tomdyq shyǵarmalar jınaǵy men estelik mereıtoılyq moneta tanystyryldy.
Konferensııada úsh baǵyt boıynsha ǵylymı baıandamalar oqylýda: hımııa, metallýrgııa jáne tehnologııa salasyndaǵy zertteýler; ádebı-pýblısıstıkalyq mura; Bóketovtyń gýmanıtarlyq jáne áleýmettik ǵylymdardaǵy qoǵam qaıratkeri retindegi róli.
