Beıimbet Ánelov
Aldymen uzaq jyldan beri qala turǵyndaryna qyzmet etip kele jatqan «Kókshetaý sý arnasy» kásipornynda boldyq. Kásiporyn turǵyn úılerge, mekemelerge, kásiporyndarǵa ınjenerlik jeliler arqyly úzdiksiz sý jetkizedi. Nysandardan aǵyndy sýdy qabyldap, tartýdy júzege asyrady. Aǵyndy sýlar sanıtarlyq, ekologııalyq talaptarǵa sáıkes tazartýdan ótkiziledi. Qorshaǵan ortany lastamaı, tazalyq saqtaý, ekologııalyq tepe-teńdikti qamtamasyz etý baǵytynda qyrýar jumys atqarylyp jatyr. Kásiporynda kásibı mamandar zamanaýı jabdyqtardy qoldana otyryp, jumys sapasyn jaqsartýǵa umtylady. Uzaq jyldan beri osynda jumys istep kele jatqan Beıimbet Ánelov – besaspap mamannyń biri.
«Negizi Aqkól aýdanyna qarasty Amangeldi aýylynyń týmasymyn. 2005 jyly osynda ornalastym. Mamandyǵym – júrgizýshi. Kásiporynda slesar bolyp 11 jyl boıy taban aýdarmastan eńbek etip kelemin, – deıdi Beıimbet Ánelov. – Jalpy, jumystyń ońaıy joq, syrt kózge baıqala bermegenimen, bizdiń jumystyń da ózindik qyr-syry bar. Bir ókinishtisi, jastar jaǵy azdaý. Jumysshy mamandyǵyn qadirleý, dáripteý týraly Prezıdent óte oryndy másele kóterip otyr. Árkim qolynan kelgenshe adal eńbek etip, naǵyz maman bolýy kerek. Bizdiń sorǵy stansasynda áıelder de jumys isteıdi. Jumystyń qanshalyqty aýyr ekenin sezinýge sál ǵana mysal keltire keteıin. Qubyr boıymen kelgen qaldyq sýdy tazalaıtyn súzgi bar. Súzgige ártúrli turmystyq qaldyq keptelip qalady. Syıymdylyǵy 20 lıtrlik shelekpen kúnine elý shaqty qaldyq shyǵarady. Jumys ornyndaǵy jaǵymsyz ıisti eskerseńiz, aýyrlyǵy tipti aıqyn baıqalady. Mine, osyndaı adal eńbek etip jatqan áriptesterimniń jumysy eskerilse eken deımin».
Kelesi kezekte «Kazrost Engineering» jeke kompanııasynda boldyq. Kompanııa aýyl sharýashylyǵy tehnıkalaryn daıyndaıdy. Dıqandardy qýatty tehnıkamen qamtamasyz etý barysynda baıypty qyzmet atqaryp keledi. 2019 jyldyń jeltoqsan aıynan bastap jumys istegen kompanııa negizinen astyq jınaý kombaındaryn shyǵarady. Kásiporynda kombaınnyń negizgi bólshekterin «KZ «Rostselmash» pen «Klever» aksıonerlik qoǵamynan alady. «Vector 410», «Acros 550» astyq kombaındarynyń birneshe túrin usynady. Oǵan qosa, shaǵyn jáne orta qýatty YTO-X904, YTO-X1304 traktorlaryn qurastyrady. Daıyn tehnıkalar «KazAgroFınans», «О́nerkásipti damytý» qorynyń lızıngtik kompanııalary arqyly astyqty alqapta el yrysyn molaıtyp jatqan dańǵaıyr dıqandarǵa jetkiziledi.
Saǵat Qurmanbaı
«Jumysymyz ózimizge unaıdy. Eń bastysy, tapsyrylǵan isti muqııat atqaryp, sapaly jumys isteý, – deıdi jınaqtaýshy slesar Qurmanbaı Saǵat. – Jalaqymyzdy ýaqytynda beredi, barlyq áleýmettik jaǵdaı jasalǵan. Qarapaıym halyqqa odan artyq ne kerek? Bir kóńilge jaǵymdy jeri, keıingi jyldary jergilikti ult ókilderiniń jastary tehnıkalyq bilim alyp, osyndaı ortada jumys isteýge yqylas tanyta bastady. Jastardyń yntasyn kórip, kóńiliń ósip qalady. Bizdiń kásiporyn aýyl sharýashylyǵy tehnıkalaryn shyǵaratyndyqtan, eńbegimiz arqyly eldiń nesibesin kóbeıtýge úles qosyp jatyrmyz degen oı mereıimizdi ústem etedi. Kásiporyndaǵy jumysshylar arasynda jaqsy dástúr qalyptasqan. Tájirıbeli mamandar eńbek jolyn jańa bastaǵan jastardy baýlyp, bilgenderin úıretip otyrady. Eń bastysy, besaspap maman bolý. Tehnıkalyq bilim alyp, bilimińdi tájirıbemen baıytyp jumys isteseń, eńbegińniń janatyny sózsiz».
Kásiporyn jumysshylary áleýmettik jaǵynan tolyq qamtamasyz etilgen. Alǵashqy kezeńde 77 adam, qazir 175 adam turaqty jumysqa ornalasqan. Árbir jumysshymen jeke kelisimshart jasalady. Kelisimshartta tegin medısınalyq qyzmet kórsetý, densaýlyǵyn qadaǵalaý, dári-dármekpen qamtamasyz etý kórsetilgen. Jumysshylar tegin tamaqtanady, jumys ornyna kompanııa kóligimen tasymaldanady.
Taǵy bir jaqsylyǵy, jergilikti kásibı bilim beretin oqý oryndarymen baılanysyn nyǵaıta túsip otyr. Onysy – eldiń erteńin oılaǵandyq. Bolashaq jas mamandardy zamanaýı kásiporynnyń tynys-tirshiligimen tanystyryp, eńbekke baýlý máselelerin myqtap qolǵa alǵan. Osy arada tájirıbeden de ótkizedi. Bolashaq mamandardyń turaqty jumysqa ornalasý máselesin de sheshedi.
«Avıks grýp» JShS janar-jaǵarmaı naryǵynda jaqsy damyp keledi. Kásiporyndaǵy tájirıbeli tehnologter ónim sapasyn jaqsartýǵa bar kúsh-jigerin jumyldyrǵan. О́nim suranysqa ıe. Básekege qabiletti bolý jolynda naryqtaǵy baǵa da nazardan tys qalmaıdy. Tynymsyz eńbekqorlyq pen jańa sheshimderdi izdestirý – seriktestik tabysynyń negizgi draıveri. Mundaǵy ystyqqa tózimdi konservanttar ónerkásipke óte qajet.
Ivan Petrojısskıı
«Zerthana barlyq qajetti qurylǵymen qamtamasyz etilgen, – deıdi zerthana meńgerýshisi Ivan Petrojıtskıı. – О́nim sapasy isimizge jaýapkershilikpen qaraýymyzǵa baılanysty. Ujymda aýyzbirlik myqty. Birlese atqarǵan soń, júk te jeńildeı túsedi. Seriktestik shyǵaratyn ónimniń barlyǵy zerthanada muqııat tekseristen ótkiziledi. Osyndaı ilkimdi jumystyń arqasynda ónimimiz de óńirde jaqsy qyrynan tanyldy. Jumysshylarǵa barlyq jaǵdaı jasalǵan. Atqarǵan jumysymyzǵa sáıkes eńbekaqymyz ýaqytynda tólenedi».
Biz tildesken jumysshylardyń barlyǵy óz mamandyqtaryn jaqsy meńgerip, aıanbaı eńbek etip júrgendikterin aıtady. Olardyń kókireginde men jumysshymyn degen maqtanysh sezim bar.
KО́KShETAÝ
