Bilikti maman jastyǵyna qaramastan búginde aýysym basshysy laýazymyn abyroımen atqaryp júr, áriptesteri arasynda qurmet, bedelge ıe. Zaýytqa 2019 jyly S.Toraıǵyrov ýnıversıtetiniń úshinshi kýrsynda oqyp júrgende kirgen eken. Talapty jastyń boıyndaǵy ushqyndy ańǵarǵan kásiporyn basshylyǵy ony birden jumysqa qabyldapty. Eldos alǵashqyda elektrolızer peshterinde alıýmınıı óndirisiniń operatory bolyp eńbek etti. Qolyna kúrek-saıman ustap, 1000 gradýsqa deıin qyzatyn peshterdiń aınalasyndaǵy qara jumysqa belsene aralasty.
«Arqa tósinde keńinen kósilip, 200 gektarǵa jýyq alqapty alyp jatqan alyp zaýyt alystan kóz tartady. О́ndiristik keshen jylyna 250 myń tonna joǵary sapaly alıýmınıı shyǵarady. Alıýmınıı ónimi búginde TMD, Eýropa elderine de eksporttalyp jatyr. Munda jumys isteýdi alǵashqy kúnnen-aq mártebe tuttym. Arada biraz ýaqyt ótken soń, kásibı turǵydan ósýim kerek degen oıǵa keldim. Basshylyqqa kirip, «О́sýim kerek, meni brıgadırlikke úıretińiz» dep edim, talabymdy quptady. Úırene kele, brıgadır, odan soń aýysym basshysy laýazymyn senip tapsyrdy. Qazirde qaraýymda 17 jumysshy bar. Barlyǵy jaýapty jumysyma túsinistikpen qarap, qoldan kelgenshe járdemdesedi. Mundaı qoldaý árdaıym jigerlendiredi», deıdi jas maman.
Eldos eń áýeli qolastyndaǵy qyzmetkerlerdiń qaýipsizdigine jaýapty. Olardyń tehnıkalyq qaýipsizdigin qadaǵalap, jumys sapasynyń tómendemeýin nazarda ustaıdy. Zaýyt mamandarynyń sózinshe, alıýmınıı óndirisi – energııany kóp qajet etetin úderis, bir ózi 420 megavatt elektr energııasyn tutynady. Salystyrý úshin aıtyp óteıik, elektrolız zaýytynyń qýat tutynýy alıýmınıı totyǵy óndirisinen (glınozem) 5 ese joǵary. Bir tonna alıýmınıı óndirýge 1,9 tonna glınozem, 0,54 tonna anod, 13 MVt elektr energııasy qajet. Elektrolız zaýytynan shyqqan bastapqy alıýmınııden álemde kábil-ótkizgish ónimder, metall konstrýksııalary, qurylys materıaldary, avtomobıl, túrli qural-jabdyqtar men aspaptar jasalady.
E.Jumabekov 18 jyldyq tarıhy bar zaýytta respýblıkalyq «Altyn gefest» syılyǵyn utyp aldy. Sondaı-aq byltyr oblystyq deńgeıde ótken «Táýelsizdik urpaqtary» baıqaýynda top jardy.
«Mundaı jetistikter kúsh-jiger syılap qana qoımaıdy, aldaǵy isterge yntalandyrady. Jumysshy mamandyqtarǵa degen kóptiń ystyq yqylasy, Úkimet pen jergilikti bıliktiń qoldaýy zor. Bıyl jumysshy mamandar úshin arnaıy ıpotekalyq baǵdarlama qabyldandy. Onyń nátıjesinde kóptegen áriptesim baspanaly boldy. Jumysshylardy qoldaýǵa baǵyttalǵan ózge de jobalar ómirsheń etilip jatyr. Osynyń barlyǵy jumysymyzǵa shabyt syılaıdy», dep atap ótti maman.
Zaýyt ujymy kópultty, tatý-tátti jaǵdaıda eńbek etedi. «Basshylar, sonyń ishinde seh basshysy, zaýyt dırektory árqaısymyzdyń oı-pikirimizdi tyńdaýǵa, ıdeıalarymyzdy qoldaýǵa árdaıym daıyn. Bizde basshyǵa kirýge saǵattap kezek kútý, oıymyzdy ashyq aıta almaý sııaqty bıýrokratııalyq is-áreket atymen joq. Barlyǵymyz bir otbasynyń músheleri sııaqtymyz. Bireýimiz úlgermeı jatsaq, ózgeleri kómektesýge daıyn turady. Ujymdyq rýh aıqyn seziledi. Mundaı jerde eńbek etýdiń ózi bir ǵanıbet. Izimdi basyp kele jatqan jastarǵa aıtarym, eń bastysy maqsatty durys qura bilý kerek. Ekinshiden, kez kelgen iste asyǵystyqqa jol bermeý mańyzdy. Maqsat durys bolsa, kez kelgen qıyndyqtan jol taýyp shyǵýǵa bolady», dep túıindedi sózin Eldos Muratuly.
Pavlodar oblysy
