Sýret: gov.kz
Forýmnyń negizgi maqsaty – Memleket basshysynyń bastamasymen júzege asyrylyp jatqan «Ádiletti Qazaqstan», «Adal azamat» qaǵıdattaryn ilgeriletip, memlekettik qyzmetshiler arasynda zań men tártiptiń ornyǵýyna aıryqsha yqpal etý. Munda, ásirese Ádep jónindegi ýákilderge erekshe jaýapkershilik júkteledi.
Is-sharanyń ashylýynda D.Jazyqbaı Prezıdenttiń Joldaýynda aıtqan «Zań jáne tártip» – memleketimizdiń myzǵymas tuǵyry. Qoǵamda osy qaǵıdany túbegeıli ornyqtyrý úshin barlyq quzyrly organdar arasynda ortaq kózqaras pen ortaq ustanym bolýǵa tıis» degen sózin tilge tıek etip, «Zań jáne tártip» qaǵıdaty memlekettik qyzmetshilerden bastaý alý kerektigin atap ótti.
Agenttik tóraǵasynyń aıtýynsha, memlekettik organdarda jańadan Profılaktıka qyzmetin qurý kózdelip otyr. Onyń negizgi mindetteri – jemqorlyqtyń aldyn alý jóninde sharalar qabyldaýdy qamtamasyz etý, memlekettik qyzmetterdiń sapasyna ishki baqylaýdy júzege asyrý, vedomstvolyq baǵynysty uıymdarynyń qyzmetin, onyń ishinde komplaens-qyzmetterdiń qyzmetin úılestirý.
Sondaı-aq erekshe nazar aýdaratyn mańyzdy ózgeristerdiń biri – qyzmettik tergep-tekserý rásimderiniń ınstıtýsıonaldyq túrde qaıta qurylýy. Bul rette kadr qyzmetteri ózderiniń negizgi mindeti – personaldy damytý men tıimdi kadrlyq saıasatty júrgizýge baǵyttalsa, qyzmettik tergep-tekserý jumystaryn uıymdastyrý jáne júrgizý ókilettigi tolyqtaı Profılaktıka qyzmetine beriledi. Bul ózgerister jańa zań jobasynda naqty qarastyrylyp, ony iske asyrý barysynda Ádep jónindegi ýákilder jetekshilik ról atqarady.
Forýmda jańartylǵan ant mátini de talqylandy. Jańartylǵan anttyń basty mindeti – memlekettik qyzmetshini quqyqtyq ǵana emes, sondaı-aq moraldyq mindetter de júktelgen memlekettiń ókili retinde aıqyndaý.
Forýmǵa qatysýshylar Ádep jónindegi ýákilderdiń derbestigin kúsheıtýge, olarǵa júkteletin mindetterdi tıimdi oryndaý tetikterine qatysty oılaryn ortaǵa saldy. Qazirgi tańda respýblıka boıynsha memlekettik organdarda 770 Ádep jónindegi ýákil qyzmet atqarady.
