Onyń aıtýynsha, konkýrsqa qyzyǵýshylyq óte joǵary boldy.
«Búgingi kúni 20 myńnan astam ótinim tústi. Azamattarymyzdyń bul baıqaýǵa qatysýǵa degen yqylasy zor. Biz aldyn ala taldaý júrgizdik. Usynystar negizinen úsh blokqa bólinedi», dedi Satqalıev Májilistegi brıfıngte.
Birinshi blok geografııalyq ataýlarǵa baılanysty. Qazaqstandyqtar Balqash, Ile, Úlken (stansııa salynatyn aýyldyń ataýyna sáıkes), sondaı-aq Moıynqum AES ataýlaryn usynǵan.
Ekinshi blok – tanymal tulǵalardyń esimderi. Olardyń ishinde akademık Shafık Chokın, aqyn-aǵartýshy Abaı Qunanbaev, ǵalym Qanysh Sátbaev bar.
Úshinshi blok tehnıkalyq jáne energetıkalyq taqyryptarǵa negizdelgen. Munda «Jaryq», «Qýat», «Beıbit atom», «Energııa» sekildi nusqalar usynylǵan.
«Usynystardy taldaý jumysyn tıisti komıssııa jalǵastyrady. Onyń quramyna etnograftar, ıstorıograftar, ýran ónerkásibi ókilderi, blogerler men qoǵam belsendileri kirgen. Barlyq usynystar jınalǵan soń ataýlar talqylanatyn bolady», dep tolyqtyrdy agenttik basshysy.
