– Árbir ustazdyń eńbegin moıyndaý – úlken mártebe. Bıyl tek mektep muǵalimderi ǵana emes, tehnıkalyq jáne kásiptik bilim berý uıymdarynyń pedagogtary, jetim jáne ata-anasynyń qamqorlyǵynsyz qalǵan balalarǵa arnalǵan mekemelerdiń ustazdary, joǵary oqý oryndarynyń oqytýshylary men pedagogıka ardagerleri de marapattaldy. Bul – bilim berý júıesiniń barlyq deńgeıindegi ustazdarǵa jasalǵan qurmet, – dedi Muhtar Talqanbaev.
Ol Jambyl oblysynda sońǵy jyldary bilim salasynda aýqymdy jumystar atqarylyp jatqanyn atap ótti.
– О́ńirde mektep qurylysyna erekshe kóńil bólinip otyr. Qazirdiń ózinde 41 bilim nysanynyń qurylysy júrgizilýde, jyl sońyna deıin 19 jańa mektep paıdalanýǵa beriledi. Bıyldyń ózinde 3 jaıly mektep ashyldy, sonymen qatar 66 mektepti jańartý bastaldy. Bul úsh aýysymdy oqýdy joıýǵa jáne balalardyń sapaly bilim alýyna zor múmkindik beredi, – dedi ol.
Sonymen qatar pedagog jańa bastamalardyń oqýshylardyń áleýetin arttyrýǵa yqpal etip otyrǵanyn aıtty.
– Balalardyń sıfrlyq saýattylyǵyn damytýǵa aıryqsha kóńil bólinýde. IT-synyptar, robototehnıka kabınetteri ashylyp, aýyl mektepteri zamanaýı qural-jabdyqtarmen qamtamasyz etilip jatyr. Sonyń arqasynda oqýshylarymyz halyqaralyq olımpıadalarda jaqsy nátıjeler kórsetip júr. Bul – jas urpaqqa jasalǵan naqty ınvestısııa, – dedi Talqanbaev.
Onyń aıtýynsha, memleket tarapynan kórsetilip otyrǵan qoldaý ustazdardy jańa jetistikterge jeteleıdi. Pedagog eńbegin baǵalaý – ult bolashaǵyna jasalǵan eń basty qadam.
