Keshe Semeıde Abaıdyń 170 jyldyǵyn merekeleý aıasynda aqynnyń ómiri men shyǵarmashylyǵyna arnalǵan www.abaialemi.kz ensıklopedııalyq onlaın portalynyń tusaýkeser rásimi ótti.
Memlekettik tildi damytý qory jasaǵan portal Qazaqstan Respýblıkasynyń Prezıdenti Nursultan Nazarbaevtyń bastamasymen óziniń «Jibek joly» beıbitshilik syılyǵyna alǵan qarjysyna ázirlendi. Elbasy osy atalǵan syılyqtyń bir bóligin áleýmettik jobalardy júzege asyrý úshin Qorǵa bergen bolatyn. Sol jobalardyń biri www.abaialemi.kz portaly bolyp otyr.
Tusaýkeser rásimine qoǵam qaıratkerleri, aqyn-jazýshylar qaýymy, túrkitanýshylar, tarıhshylar, ǵalymdar, Abaı shyǵarmalarynyń aýdarmashylary jáne alys-jaqyn shetelderden kelgen qonaqtar qatysty. Osy saltanatty shara barysynda uly aqynnyń shyǵarmashylyǵy men ómirindegi buǵan deıin belgisiz bolyp kelgen jaıttarǵa arnalyp, Qordyń arnaıy tapsyrysymen túsirilgen «Abaıdyń uly jumbaǵy» atty jańa rýhanı-aǵartýshylyq derekti fılm kórsetildi. www.abaialemi.kz onlaın portalynda uly Abaı dáýiri, onyń izbasarlary týraly málimet, abaıtaný eńbekteri, zamandastarynyń estelikteri, Abaıǵa arnalǵan shyǵarmalar bar. Portalda túrli aqparat kózderi: kitaptar, gazet-jýrnaldar, ǵylymı basylymdar, derekti fılmder, foto muraǵattardan alynǵan derekter ornalastyrylǵan. Mundaǵy qazaq, latyn jáne arab tilderindegi aqparat mynadaı bólimder boıynsha ornalasqan: Abaıdyń ómirbaıany, shyǵarmashylyǵy, Abaı álem tilderinde, Abaı óleńderi, Abaı týraly estelikter, abaıtaný, abaıtanýshy-ǵalymdar, «Abaı joly» epopeıasy, estelik jerler, Abaı murajaıy, fotogalereıa. Is-shara sońynda Memlekettik tildi damytý qorynyń dırektory Azat Shaýeev atalǵan portaldyń jas jetkinshekter, stýdentter, abaıtanýshy ǵalymdar, aqyn shyǵarmalaryn ózge tilge aýdaryp júrgen aýdarmashylar, Abaıdyń rýhanı murasyna qyzyǵýshylyq bildirgen ǵalamtor júıesindegi barlyq paıdalanýshylar úshin asa mańyzdy ekenin atap ótti. «Bizdiń Qor qazirgi zaman múmkinshilikterin paıdalana otyryp, álemniń qaı túkpirinen bolmasyn qazaqtyń jazba ádebıetiniń negizin qalaǵan tulǵa týraly aqparat alýǵa tilek bildirgen adamnyń qajetti málimetti tabýyna múmkindik beretin osyndaı tuńǵysh ınternet-portaldy iske qosyp otyr», dedi ol.
Dýman Anash, «Egemen Qazaqstan».
