Eli ádil baǵasyn berdi

Qalyptasqan dástúrge sáıkes, Taldyqorǵanda Almaty oblysynyń ákimi Amandyq Batalov bir jylda atqarylǵan jumystar boıynsha óńir halqynyń aldynda esep berdi. Belgilengen kún tártibine sáıkes birinshi kezekte oblys ákimi baıandama jasap, «Memleket basshysynyń tikeleı qoldaýymen bir jyl ishinde oblystyń áleýmettik-ekonomıkalyq damý kórsetkishteri ónerkásipte 1,9 paıyz­ǵa, aýyl sharýashylyǵy salasy­nyń jalpy ónimi 1,4 paıyz­ǵa artty dedi. Qury­lys jumystarynyń kólemi 202 mlrd. teńgege jetip, 453 mlrd. teńge ınves­tısııa tartylyp, memle­ket­tik bıýdjetke 289 mlrd. teńge tústi. 20 myń 700 jumys orny ashyldy. Aǵym­daǵy jyly osy qarqyndy saqtaı otyryp, ekonomıkanyń ósimin 2,5 paıyz­ǵa qamtamasyz etýdi josparlap otyrmyz. Ol úshin daǵdarysqa qarsy «Nurly Jol» baǵdarlamasy, ekinshi besjyldyqqa arnalǵan ındýstrııalyq-ınnovasııalyq damý, «Agrobıznes-2020», «Bıznestiń jol kartasy-2020» baǵdarlamalaryna sáıkes jumys júrgizemiz. Negizinen agrarly oblys bolǵan­dyq­tan aýyl sharýashylyǵy salasyna basa nazar aýdarylatyny anyq. Ras, iri qara etiniń eksporttyq áleýetin damytý baǵdarlamasynyń ótken jylǵy jos­pary oryndalmaı 100 tonna ettiń ornyna nebári 20 tonna ǵana et óndirildi. Bul kemshilikti túzetý úshin aýdandarǵa arnaıy issaparmen baryp, atqarylyp jatqan jumysty kórip zerdelegenimde osyǵan deıin qurylǵan mal bordaqylaý alańdary qarabaıyr, óz qýattylyǵynan áldeqaıda tómen (70 paıyz­) jáne barlyq aýdandarda mal basy jetkilikti bolǵanymen, keı jerlerde alańdar múldem joq boldy. Oblysymyzdaǵy et baǵytyndaǵy mal ósirýshileriniń aldyna qýattylyǵy 1,5 myń bastan asatyn zamanǵa saı mal bordaqylaý alańdaryn, iri reprodýk­tor-sharýashylyqtar qurýǵa talap qoı­dym. Sondyqtan, bıylǵy jyly 1 700 tonna et eksportyn qamtamasyz etýimiz qajet. Biz bul maqsatqa qol jetkize alamyz, óıtkeni, búgingi kúnge «Sybaǵa», «Qulan», «Altyn asyq» baǵdar­lamalary aıasynda qurylǵan mal borda­qylaý alańdarynda 43 myńǵa jýyq mal basy bar. Sonymen qatar, 27,5 myń basqa arnalǵan iri qara malynyń 457 fer­merlik sharýashylyǵy qurylyp, 9 myń bas asyl tuqymdy mal shetelden ákelindi. Munda eń mańyzdysy, eksporttalatyn et muzdatylyp óńdelgen, arnaýly oramaǵa salynǵan, ıaǵnı standarttarǵa saı bolýy tıis. Bul maqsatta Úlken Almaty aınalma avtokólik joly boıynda et, sút, kókónis óńdeıtin shaǵyn sehtar, saqtaý qoımalary ashylatyn bolady. Búginde segiz jer telimi anyqtalyp, bir mal soıý sehy iske qosyldy, dedi oblys ákimi. Bilim berýdi damytý memlekettik baǵdarlamasynyń negizgi qozǵaýshy kúshi men kórsetkishteri tolyq oryndalǵan. Barlyǵy 52 nysanǵa kúrdeli jóndeý júrgizildi. Memleket basshysynyń «Nurly Jol – bolashaqqa bastar jol» atty Joldaýyna sáıkes bıylǵy jyly negizgi kúsh apatty jaǵdaıdaǵy jáne úsh aýysymdy mektepterdiń problemalaryn sheshýge, mektepke deıingi mekemelermen qamtýdy arttyrýǵa jumsalady. Qazirgi ýaqytta apatty mektepterdiń máselesi sheshimin tapty. Úsh aýysymdy 51 mekteptiń qurylysy josparlandy. Onyń ishinde 33-i Elbasynyń tapsyrmasymen Ulttyq qor qarajaty esebinen salynatyn bolady. Bizdiń esebimiz boıynsha, 245 balabaqsha ashý qajet. Árıne, munyń barlyǵyn bıýdjet esebinen salý múmkin emes. Sondyqtan, 133 balabaqshany jeke ınvestısııalar tartý arqyly ashý kózdeldi. «Salamatty Qazaqstan» memlekettik baǵdarlamasynyń kórsetkishteri boıynsha densaýlyq saqtaý salasynda nátıjeli jetistikterge qol jetken. «350 dárigerlik emhanalar» baǵdarlamasy ­aıasynda 36 medısına mekemesi salyndy. Qazirgi zamanǵa saı qural-jabdyqtar­men tolyqtyrylǵan jańa kardıohırýrgııa ortalyǵy ashyldy. Raıymbek aýdany­nyń Kegen aýylynda 250 naýqasqa arnal­ǵan sońǵy úlgidegi emhana salyndy. Kelesi jyldan bastap Taldyqorǵan qalasy­nyń turǵyndaryna 300 oryndyq kópsalaly qalalyq aýrýhana, Kóksý aýdany­­nyń Balpyq bı aýylynda 250 naýqasqa arnalǵan emhana medısınalyq qyz­met kórsetetin bolady. 2015 jylǵa arnalǵan basty mindetter «Nurly Jol» Jańa Ekonomıkalyq Saıasaty jáne ústimizdegi jyldyń 11 aqpandaǵy Úkimettiń keńeıtilgen otyrysynda berilgen tapsyrmalar negizinde aıqyndaldy. Elbasy «Biz bir bólshegi bolyp sanalatyn álemdik naryqtyq ekonomıkada mundaı aýytqýlar bolyp turady. Bul ýaqytsha jaǵdaı, onyń sheshimi tabylady», dep aıtqanyndaı, biz osy kezeńde oblysymyzdyń áleýetin arttyrý jolynda 2030-shy jylǵa deıingi damý baǵdarlamasy men ınves­torlardy tartý strategııasyn aıqyndap alýǵa tıispiz», dedi Amandyq Batalov. Esepti kezdesýge qatysqan Densaý­lyq saqtaý jáne áleýmettik qorǵaý mınıstri Tamara Dúısenova halyqty jumyspen qamtý barysynda memle­ket tarapynan ­jasalatyn jaǵdaılar, árıne, arnaýly baǵdarlamalar jaıly jan-jaqty ­tú­si­nik berdi. Turǵyndar jaryssózge shyǵyp, ár­qaısysy óz salasy boıynsha oblys áki­minen kórip otyrǵan qamqorlyǵyn pash ete turyp, Amandyq Batalovtyń bir jylda atqarǵan jumysyna qanaǵattanarlyq degen baǵa berdi. Shyny kerek, bes saýsaq birdeı emes qoı. Jeke máselelerin de turǵyndar kótere bildi. Bul rette basa aıtar jaıt, bul kúni eldiń tarapynan kóterilgen ózekti máselelerdiń barlyǵymen oblys ákiminiń tanys bolǵandyǵy jáne sol problemalardy retteý jumystarynyń bastalyp ketkendigi boldy. Qalaı desek te, halyqtyń aty halyq. Júzbe-júz turyp jalǵan aqpar berýge el jibermeıdi. Demek, Amandyq Batalovtyń dúıim jurttyń aldynda júziniń jarqyn bolyp turǵandyǵy kóp jaıdy ańǵartsa kerek. Eksheı bilsek, jol salý, kógildir otyn tartý, qyzylsha, júgeri ósirý, kásipkerlerdi qoldaý úshin shalǵaıdaǵy aýyldardan ekinshi deńgeıdegi bank fılıaldaryn ashý máselesin tıisti tulǵalar aldyna qoıa bilý jáne bıznesmenderge «Elbasy keshe sizderdiń bıznesti damytýlaryńa múmkindikter týdyryp, búgin qoldap, qorǵap otyrǵanyn durys túsinip, sonyń qaıtarymy retinde balabaqshalar, sport keshenderin salyp berińizder», dep talap qoıa bilýi iskerlikti ańǵartyp turǵandaı áser etti. Qoryta aıtqanda, oblys ákiminiń jumysy turǵyndardan qanaǵattanarlyq degen ádil baǵasyn aldy. Nurbol Áldibaev, «Egemen Qazaqstan». Almaty oblysy.