Bıyl ustazdar kúni merekesi mańǵystaýlyqtarǵa jaǵymdy jańalyqpen bastaldy. Mańǵystaýlyqtar keńinen tanıtyn azamat, belgili ustaz Qýantqan Vanov Memleket basshysynyń qolynan «Qazaqstannyń eńbek sińirgen ustazy» qurmetti ataǵyn aldy.
1974 jyly Gýrev pedagogıkalyq ınstıtýtyn matematıka pániniń muǵalimi mamandyǵy boıynsha úzdik bitirgen maman 1974 jyldan 2004 jylǵa deıingi aralyqta Mańǵystaý oblysyndaǵy E.Aıshýaquly atyndaǵy orta mektepte matematıka páninen sabaq berdi.
Onyń matematıka sabaǵynda qoldaný úshin oılap tapqan «Demonstrasııalyq taqta», «Besaspap sırkýl» atty quraldary 1990 jyly Búkilodaqtyq ónertapqyshtar konkýrsynyń Qurmet gramotasyna ıe boldy. Ol matematıkany oqytýda qoldanylatyn doneskilik pedagog V.Shatalov ádistemesin zerdeleýmen aınalysyp, ony jetildirý arqyly «О́zgermeli súıenish jazba», «Baǵalaýdyń ekilik júıesi» sııaqty ózindik ádistemesin oılap shyǵardy. 1988–1990 jyldary Mańǵystaý oblysynda onyń matematıkany oqytý ádistemesi boıynsha qurylǵan ozat tájirıbe mektebi jumys istep, ozat ustazdyń tájirıbesi Aqtóbede ótken ustazdar sletinde qoldaý tapty. Sondaı-aq Pavlodar oblysynda ótken respýblıkalyq pedagogıkalyq oqýda júldeger atandy.
Tájirıbeli muǵalim egemen elimizdegi orta mekteptiń alǵashqy matematıka oqýlyqtarynyń avtory. Onyń «Matematıka-5» oqýlyǵynyń alǵashqy basylymy 1993 jyly, «Matematıka-6» oqýlyǵy 1994 jyly jaryq kórdi. Bul oqýlyqtar 1993 jyldan 2000 jylǵa deıin respýblıka mektepterinde jáne keıbir sheteldegi qazaq mektepterinde qoldanyldy. Al 1985–2000 jyldary Mańǵystaý oblystyq muǵalimder bilimin jetildirý ınstıtýtynyń turaqty lektory bolyp, respýblıkamyzdyń birneshe oblysynda óziniń tájirıbesi men oqýlyqtary boıynsha arnaýly kýrs ótkizdi.
«Jigitke jeti óner de az» degendeı, matematıkanyń maıyn ishken Qýantqan Rzauly keıingi kezde dybystaný salasymen, álipbı túzý máselelerimen aınalysyp júr. Bul oraıdaǵy eńbekteri merzimdi baspasóz ben birneshe respýblıkalyq, halyqaralyq konferensııalar jınaǵynda jaryq kórgen. Jaqynda onyń tilge qatysty eńbekteri «Emlemizdegi qaıshylyqtar jáne fonetıkalyq álipbıdiń artyqshylyǵy» degen ataýmen jeke kitap bolyp shyqty.
Taǵy bir aıryqsha óneri – sazger ári ánshi. Baıannyń qulaǵynda oınap, alýan ándi shyrqaıtyn Qýantqan Rzaulynyń balalar men úlkenderge arnalǵan kóptegen áni bar. Mańǵystaý oblysynyń birneshe mektebi onyń «Biz – jas ulan», «Qaınary bilimniń» ánderin mektep ánurany retinde paıdalanyp júrse, «Jas ulandar jyry» oblys jas ulandarynyń, al «Ustazdar áni» oblys ustazdarynyń gımni bolyp sanalady. Onyń ánderi boıynsha Mańǵystaý oblysynda eki ret arnaıy shyǵarmashylyq kesh ótkizilse, «Án lebiz» degen atpen 30 shaqty jeke týyndylary toptastyrylǵan án jınaǵy jaryq kórdi.
Búginde Mańǵystaý oblysynyń birneshe mektebinde Q.Vanov atyndaǵy kabınet ashylyp, Munaıly aýdanynda biraz jyldan beri onyń atyndaǵy oqýshylar olımpıadasy ótip keledi. Al Túpqaraǵan aýdanynda Q.Vanov atyndaǵy muǵalimder olımpıadasy ótkiziledi.
«Adam jumysty marapat úshin istemeıdi, biraq eńbegiń úshin marapat alyp jatsań, ol kóńilińdi kóteredi, jańa jumysqa shabyttandyrady, berilgen ataqqa saı bolǵyń keledi. Buryn jasaǵan azǵantaı eńbegimizdi umytpaı elep-eskerip, joǵary marapat bergen el basshylyǵyna yrzalyǵym sheksiz, rahmet aıtamyn!», deıdi ulaǵatty ustaz aǵynan aqtarylyp.
Mańǵystaý oblysy
