Aıtysker aqynnyń mereıtoıy bilim alǵan mektebinde bastaldy. Bilim shańyraǵyna aqyn esimi jazylǵan eskertkish-taqta ilindi. Eske alý sharasyna jıylǵan sóz zergerleri men aıtys óneriniń maıtalmandary ot aýyzdy Orazalynyń otyzǵa tolmaı, qamshynyń sabyndaı ǵumyrda halqymyzdyń rýhanı qazynasyna qaıtalanbas mol mura qaldyryp, aıtys ónerinde ózindik mektep qalyptastyrǵanyn estelik-áńgimege arqaý etti. Tipti bala Orazalyny bas-taýysh synyptan baptaǵan ustazy da onyń kúlimdep turatyn jyp-jyly beınesin eljireı eske aldy.
«Mektep tabaldyryǵyn attaǵannan Orazaly óte zerek boldy. Oqýshylar «Baldyrǵan» jýrnalyna jazylatyn. Ondaǵy taqpaq, jańyltpashtardy tez jattap alatyn. Ylǵı jymıyp júretin edi. Kópbalaly otbasynan shyqqan Orazdyń júzine meıirim uıalap turatyn», deıdi bastaýysh synyp muǵalimi Baqytgúl Rahymova.
Súıinbaıdyń 170 jyldyq toıynda ózinen jasy áldeqaıda kishi Orazalyny shabysynan tanyp, shyn talantqa batasyn bergen aıtys óneriniń búgingi aqsaqaly Shorabek Aıdaruly: «Myna zańǵar taýlary bar ólkede Orazalydaı keń tynysty, úlken júrekti aqynnyń týmaýy múmkin emes eken. «Tulpar izin taı basar», urpaqtar jalǵasa bersin», dep izgi tilegin bildirdi.
Ot aýyzdy, oraq tildi Orazalynyń sheshendik óneri men ómirin arqaý etken is-sharada sóz tıegi asaý ózendeı aǵytyldy. Aıtys álemine qanatyn qomdaǵan bala Orazalyny qolynan jetektep, qoldaý bildirgen el aǵalary, Raıymbek aýdanynyń Qurmetti azamaty Yzǵarbek Bektursynov, Jazýshylar odaǵynyń múshesi, «Muqaǵalı» jýrnalynyń bas redaktory Dúısen Maǵlumov, zeınetker ustazdar Dáýlet Shákenov, Janatkúl Daýqabaqova jáne marqumnyń synyptas, kýrstastary da estelikterin aıtty. Sondaı-aq aqyn atyndaǵy qoǵamdyq qordyń uıytqy bolýymen Orazaly Dosbosynovtyń aıtystary toptastyrylǵan «Aqynmyn sózi jeter san ǵasyrǵa» atty kitaptyń tusaýy kesilip, oqyrmanǵa jol tartty.
«Ornynda bar ońalar» demekshi, aıtys aqtańgeriniń artynda qalǵan qyzy Nuraısha men uly Nursultanǵa el-jurty at mingizdi. Án men kúı tógiltti. Mektep janyndaǵy saıabaqqa aǵashtar otyrǵyzyldy.
Osylaısha, Táńirtaý aıasyn dúbirge bólegen mereıtoı kelesi kúni Narynqol aýylyndaǵy Baqqoja Muqaı atyndaǵy aýdandyq mádenıet úıinde ótken «Qulmambettiń qulyny» atty oqýshylar arasyndaǵy respýblıkalyq aıtysqa ulasty. Oǵan elimizdiń ár óńirinen kelgen 20-ǵa jýyq jas aıtysker qatysyp, ózara baq synasty. Aıtys qorytyndysynda shashasyna shań juqtyrmaǵan shyn júırikter anyqtalyp, qarjylaı syılyqtar tabys etildi.
Almaty oblysy
