Jasandy ıntellektiniń qarqyny kúsheıip, sıfrlyq tehnologııalar kúndelikti ómirimizge dendep enip jatqan ýaqytta baǵdarlamalaý tilin erte jastan meńgerý – zaman talaby. Osy oraıda mekteptegi ınformatıka pániniń róli aıryqsha. О́ıtkeni dál osy pán oqýshynyń algorıtmdik oılaý qabiletin qalyptastyryp, sıfrlyq saýattylyǵyn arttyrady. Buǵan jýyrda ótken halyqaralyq bilim saıystaryndaǵy jetistikterimiz naqty dálel bolmaq.
Bolgarııanyń Shýmen qalasynda ótken Eýropalyq ınformatıka olımpıadasynda el namysyn qorǵaǵan tórt oqýshynyń barlyǵy jeńis tuǵyrynan kórindi. Atap aıtqanda, Atyraý oblystyq «Bilim-Innovasııa» lıseıiniń 9-synyp oqýshysy Qurmet Ábilmansur kúmis medalǵa ıe bolsa, Kókshetaý qalasyndaǵy «Bilim-Innovasııa» lıseıiniń 9-synyp oqýshysy Shaımerden Nuráli, О́skemen qalasyndaǵy «Bilim-Innovasııa» lıseıiniń 9-synyp oqýshysy Saıat Iýsýpov, sondaı-aq Kókshetaý qalasyndaǵy «Bilim-Innovasııa» lıseıiniń 9-synyp oqýshysy Maǵjan Dinmuhammed qola medalǵa qol jetkizdi.
EJOI-2025 qorytyndylary ozat oqýshylarymyzdyń joǵary daıyndyq deńgeıin jáne otandyq baǵdarlamalaý mektebiniń halyqaralyq arenadaǵy básekege qabilettiligin taǵy bir márte dáleldedi.
Komandanyń ǵylymı jetekshileri – Qazaq-Brıtan tehnıkalyq ýnıversıtetiniń assıstent-professory Álimjan Amanov pen Respýblıkalyq jáne halyqaralyq olımpıadalardyń jeńimpazy, sporttyq baǵdarlamalaý chempıony Batyr Sardarbekov.
Al Astanadaǵy Nazarbaev zııatkerlik mektebiniń 11-synyp oqýshysy Batyrhan Muhtarhan Grekııada ótken halyqaralyq ekonomıka olımpıadasynda (EO-2025) absolıýtti chempıon atandy.
Bási bıik bul saıysqa álemniń túkpir-túkpirinen iriktelip ótken, «sen tur, men ataıyn degen» 100 myńnan astam kil myqtylar qatysty. Fınalda 28 elden kelgen 128 úzdik qatysýshy baq synady. Olar ekonomıka men qarjy salasyndaǵy eń kúrdeli teorııalyq jáne praktıkalyq tapsyrmalardy taldaýdan bastap sheshimderdi modeldeýge deıin oryndady.
Jalpy esepte bizdiń Batyrhan birinshi oryndy ıelenip, AQSh, Kanada, Qytaı, Nıderlandy, Polsha, Chehııa, Grekııa jáne basqa da elderden kelgen qarsylastaryn shań qaptyrdy.
Aıta keteıik, Batyrhannyń qorjynynda birqatar jetistikter bar. Ol – Ekonomıka jáne qarjy boıynsha respýblıkalyq olımpıadanyń qola júldegeri, IEO-2024 (Gonkong) qola, IEO-2025 (Ázerbaıjan) altyn medal ıegeri. Sondaı-aq EFI olımpıadasynda jeńiske jetip, EO-2025 jarysynda absolıýtti chempıon atandy.
«Men úshin eń bastysy – jańa nárseni úırený, kúrdeli tapsyrmalardy sheshý jáne ózimdi damytý. О́zin-ózi temirdeı tártipke baǵyndyra almaǵan talapker jeńis tuǵyryna talpynbaı-aq qoıýyna bolady. Men bul olımpıadaǵa birneshe jyl tynbaı daıyndaldym. Mine, búgin sol eńbektiń jemisin kórip otyrmyz. Árıne, bul jeńispen toqtap qalmaı, aldaǵy ýaqytta ǵylymǵa óz úlesimdi qossam deımin», deıdi ol.
Batyrhan Muhtarhan – jańa býyn zııatkerleriniń ókili. Onyń jetistikteri tek jeke jeńis qana emes, sonymen qatar elimizdiń álemdik bilim arenasyndaǵy bedelin arttyrdy.
