Istiń basty fıgýranty – Shymkent qalasy UQK departamentiniń burynǵy birinshi orynbasary Manat Sarbasov para alý jáne qylmystyq jolmen kelgen tabysty zańdastyrý baptary boıynsha kináli dep tanyldy. Ol ortasha qaýipsizdik mekemesinde jazasyn óteý úshin 12 jylǵa bas bostandyǵynan aıyryldy.
Sonymen qatar, Sarbasov UQK podpolkovnıgi sheninen aıyrylyp, eki bólmeli páteri men Toyota Land Cruiser kóligi tárkilendi. Ol 70 mıllıon teńge kólemindegi para somasyn memleketke qaıtarýǵa mindetteldi.
Tergeý derekterine sáıkes, 2019–2020 jyldary Sarbasov kásipker Elmıra Dúısenqyzynan kolledjge qamqorlyq kórsetý úshin 45 mıllıon teńge, al jeke mektepke qoldaý kórsetý úshin taǵy 70 mıllıon teńge alǵan. Aıyptaý nusqasy boıynsha, bul qarajatty ol eki páter men jol talǵamaıtyn kólik satyp alý arqyly "jýdyrǵan". Páterlerdiń birin jóndeýden keıin úsh ese qymbatqa satqan.
Sarbasovpen birge sotqa taǵy tórt adam tartyldy: Shymkent qalasy densaýlyq saqtaý basqarmasynyń burynǵy basshysy Temirhan Varzılov, onyń orynbasary Shyńǵys Jańabaev, kásipker Erlan Tyshqanbaev jáne UQK maıory Aıdos Sraıylov.
Prokýratýra nusqasy boıynsha, Varzılov, Janabaev jáne Tyshqanbaev medısınalyq jabdyqtardy jetkizý jáne maskalardy qymbat baǵamen satyp alý kezinde bıýdjet qarajatyn jymqyrýǵa qatysqan. Memleketke keltirilgen jalpy shyǵyn 130 mıllıon teńgeden asady.
Prokýror Varzılov pen Janabaevqa 8 jyl, al Tyshqanbaevqa 7 jyl bas bostandyǵynan aıyrý jazasyn suraǵanymen, sot jeńil úkim shyǵardy:
- Temirhan Varzılov – 4 jylǵa bostandyǵyn shekteý
- Shyńǵys Jańabaev – 7 jylǵa bas bostandyǵynan aıyrý
- Erlan Tyshqanbaev – 5 jylǵa bostandyǵyn shekteý, sot zalynan bosatyldy
UQK maıory Aıdos Sraıylov QR QK 304-baby (zańsyz kásipkerlik) boıynsha kináli dep tanylyp, 1 jylǵa bostandyǵyn shekteý jazasyna kesildi. Alaıda qoldanystaǵy raqymshylyqqa baılanysty ol jazasyn ótemeıdi.
