Ortalyq kommýnıkasııalar qyzmeti alańynda jańa zaman talaptary men syn-qateri – sıfrlandyrý men jasandy ıntellektige, sondaı-aq qylmys sıpatynyń ózgerýine oraı salada bolyp jatqan ózgerister jaıynda brıfıng ótti. Onda Ádilet mınıstrligi Sot saraptamalary ortalyǵynyń dırektory Baqytjan Baıtilesov sóz sóılep, ortalyqtyń materıaldyq-tehnıkalyq bazasyn nyǵaıtýdy, ınnovasııalyq ádistemelerdi ázirleý men úderisterdi sıfrlyq transformasııalaýdy ushtastyra otyryp, óz qyzmetin júıeli túrde jańǵyrtý máseleleri týraly aıtty.
«Bıyl zerthanalyq jabdyqtarǵa arnalǵan baǵalar qaıta qaralyp, esepteldi. Bul jabdyqtar sarapshylarǵa esirtki zattarynyń izdik mólsherlerin anyqtaýǵa, olardyń hımııalyq qurylymyn dál belgileýge jáne zańsyz naryqta jıi paıda bolyp jatqan jańa sıntetıkalyq esirtkilerdi der kezinde tanýǵa múmkindik beredi. Bul – zamanaýı gazdy hromatograftar, mass-spektrometrler jáne suıyqtyq hromatograftar. Onsyz sot úderisterinde sapaly ári ǵylymı negizdelgen qorytyndylardy qamtamasyz etý múmkin emes», dedi spıker.
Sot saraptamalary ortalyǵy zerthanalyq bazany jańartýmen qatar ádistemelik áleýetti damytýdy da nazardan tys qaldyrmaıdy. Qazir sıfrlyq aktıvterdiń aınalymy men qarjy aǵyndaryna, sondaı-aq ar-namys pen qadir-qasıetti qorlaý belgilerine qatysty nysandardy saraptamalyq zertteý júrgizýge arnalǵan jańa ádistemelik jobalar ázirlenip jatyr.
Olardyń alǵashqysy – sıfrlyq aktıvterge qatysty isterdi tergeý barysynda aınalym kólemin belgileýge, sondaı-aq aqsha qarajaty men olardyń balamalarynyń aınalymyn anyqtaýǵa arnalǵan. Bul ádisteme sıfrlandyrý jaǵdaıynda ekonomıkalyq qylmystardy tergeýde biryńǵaı ári ǵylymı negizdelgen tásil úshin mańyzǵa ıe.
«Memleket basshysy óz Joldaýynda kıberqylmysqa, onyń ishinde kıberalaıaqtyqqa qarsy belsendi kúres júrgizý qajettiligin, sondaı-aq osy salada tergeý júrgizetin memlekettik organdardyń quzyretterin arttyrýdyń mańyzdylyǵyn erekshe atap ótti. Osyǵan oraı, jańa ádisteme zalaldy esepteý dáldigin edáýir arttyryp, sonyń nátıjesinde isterdi sotta qaraý kezinde dáleldemelik bazany nyǵaıtýǵa múmkindik beredi», dedi ortalyq basshysy.
Onyń aıtýynsha, ekinshi ádisteme ar-namys pen qadir-qasıetti qorlaý belgilerin qamtıtyn nysandarǵa sot-saraptamalyq zertteý júrgizýge baǵyttalǵan. Onyń engizilýi mundaı faktilerdi baǵalaýdyń obektıvti quralyna aınalady. Bul medıa keńistiktegi quqyq buzýshylyqtar kóbeıip turǵan kezde asa mańyzdy.
Sondaı-aq B.Baıtilesov sot-medısınalyq tájirıbege sıfrlyq tehnologııalar engizilip jatqany jaıynda baıandady. Atap aıtqanda, fılıaldardyń birinde vırtýaldy aýtopsııa boıynsha qanatqaqty joba bastalǵan. Joba aıasynda zertteý júrgizilip, dástúrli aýtopsııa kompıýterlik tomografııamen salystyrylyp, nátıjeler birqatar ólim jaǵdaıy boıynsha saraptamalyq qorytyndylardyń tolyq sáıkestigin kórsetken.
«Bul nátıje óte mańyzdy: ol kompıýterlik tomografııany tek kómekshi retinde ǵana emes, sonymen qatar sot-medısınalyq zertteýlerdiń balama ádisi retinde de qoldanýǵa bolatyndyǵyn kórsetedi. Vırtýaldy aýtopsııa qorytyndylardyń obektıvtiligi men senimdiligin saqtaı otyryp, eń az aralasýmen taldaýdy qamtamasyz etedi. Bul, ásirese dástúrli aýtopsııany júrgizý qıyn nemese áleýmettik turǵydan qajet bolǵan jaǵdaılarda óte mańyzdy», dedi spıker.
