Kórkem qoltańbasymen tanylǵan sheber shabytyn qazaq halqynyń baı mádenı dástúri men ómir saltynan alyp, ulttyq bolmysymyzdy maıly boıaý arqyly sheber beıneleı bildi. Onyń týyndylaryndaǵy basty keıipkerler – ulttyq kıim kıgen qyz-kelinshekter men kımeshek jamylǵan, jaýlyq taqqan ájeler. Sýretshi olardyń qarapaıym kúndelikti turmysyn názik lırıkamen jáne kórkemdik talǵammen jetkizdi. Kórmege qoıylǵan ár kartına halqymyzdyń qatpar tarıhynan syr shertedi.
"Shyǵarmashylyq jolynyń alǵashqy kezeńderinde sýretshi ómir shyndyǵyn, óz áserin meılinshe shynaıy berýge tyrysty. Batyrlar, ańyz-ápsanalar men mıfter taqyryby onyń qııalyn oıatyp, olardy ózindik kórkemdik tilmen beıneleý arqyly erekshe obrazdar jasady. Ýaqyt óte kele ol fılosofııalyq ári sımvolıkalyq taqyryptarǵa da bet buryp, ómirdiń mánine tereń úńile bastady. Onyń týyndylarynda qazaq mádenıetiniń ajyramas belgileri — ulttyq órnekter, keń dala, turmys-salt beıneleri anyq kórinis tapty. Osy arqyly ol kúndelikti bolmysty ǵana emes, ata-baba rýhymen jalǵasqan tereń rýhanı baılanysty da sheber jetkizdi", -deıdi ónertanýshylar.
Nurbazar Qojın shyǵarmashylyǵyna realızm men natýralızm baǵyttary, sondaı-aq ımpressıonızm elementteri tán. Sýretshiniń týyndylary Qazaqstannan bólek, AQSh, Germanııa, Fransııa, Qytaı, Japonııa, Reseı jáne basqa da elderdiń jeke kolleksııalarynda saqtaýly.
Kórmeniń ashylý saltanatynda belgili óner qaıratkerleri sýretshi shyǵarmashylyǵy haqyndaǵy óz oılarymen bólisip, onyń ómir-tynysy, azamattyq bolmysy týraly jarqyn estelikter aıtty.
