Bala tabıǵatyn tanyp, kishkentaı oqyrmannyń júrek lúpilin dóp basatyn shyǵarma jazý, keshegi ertegini búgingi ómirden kórip júrgen tehnokrattyq dáýir jetkinshekterin tańǵaldyrý kez kelgen qalamgerdiń ońtaıyna kele bermeıdi. Túrki elderiniń jas oqyrmanyna sapaly, mazmuny tereń, tili kórkem shyǵarmalar usynǵan qalamgerlerge beriletin mártebeli syılyq bıyl jazýshy Sáýle Dosjanǵa buıyrǵanyn súıinshilegenimiz jón.
Túrik til qoǵamy bul marapatty 2022 jyldan beri tabystap keledi. Qoltańbasynda halqymyzdyń baı bolmysyn, ulttyq tárbıe, adamgershilik pen izgilikti arqaý etken jazýshynyń aıtýly jetistigin tutas qazaq ádebıetine berilgen qurmet dep qabyldadyq.
Ankaradaǵy Atatúrik mádenıet, til jáne tarıh joǵary mekemesiniń Bılkent kampýsynda ótken saltanatty rásimge tanymal ǵalymdar, qalamgerler men mádenıet maıtalmandary qatysty. Syılyq ıegerleri qatarynda Sáýle Dosjanmen qatar, ázerbaıjandyq Zahıd Halılov, qyrǵyzstandyq Súleıman Rysbaev, ózbekstandyq Mırazız Azam jáne Soltústik Kıpr Túrik Respýblıkasynan Shyryn Zaferjuldyzy Zaımaǵoǵlý bar.
Saltanatty rásimdi ashqan Túrik til qoǵamynyń tóraǵasy Osman Mert: «Balalar ádebıeti – tek ádebıet emes, halyqtyń erteńi. Sebebi bala boıyna dán sebetin alǵashqy kúsh – sóz. Al sol sózdiń júıesin túzep, júrekke jetkizetin – balalarǵa arnalǵan sapaly ádebıet», dep, túrki halyqtarynyń ádebı keńistigin ortaq baǵytqa uıystyrý jas urpaqqa ortaq qundylyq darytý jolyndaǵy mańyzdy qadam ekenin atap ótti.
Ádebıet arqyly rýhanı birligimizdi nyǵaıtýǵa baǵyttalǵan bedeldi syılyqqa ıe bolǵan Sáýle Dosjannyń balalar ádebıetindegi orny – jeke toqtalýǵa turarlyq. Jazýshy oqıǵalardy baıandap qana qoımaı, jas oqyrmannyń jandúnıesin tárbıeleýge, olardyń boıyna meıirim men adamgershilik, ádilet pen otansúıgishtik sekildi asyl qasıetter ornyqtyrýǵa den qoıǵan, «balalarmen bir tilde sóılese alatyn» qalamger. Bul – onyń shyǵarmashylyq jolyna berilgen laıyqty baǵa ǵana emes, túrki dúnıesine ortaq qundylyqtardy dáripteý jolyndaǵy tabandy eńbeginiń jemisi.
Osy oraıda, Qazaqstannyń Túrkııadaǵy Elshiligi men «TURKTAV» qorynyń uıytqy bolýymen jazýshynyń «Aýyldan shyqqan mıllıoner» atty kitabynyń túrik tiline tárjimelengen basylymynyń tusaýkeseri ótti.
ALMATY
