Sýretti túsirgen – Erlan OMAR, «EQ»
Bul baılanys azamattyq qoǵamdy tolǵandyratyn birqatar ózekti másele boıynsha naqty sheshimder qabyldaýǵa múmkindik berdi. Mınıstrdiń pikirinshe, búgingi jıyn azamattyq sektormen áriptestikti odan ári nyǵaıtýǵa baǵyttalǵan mańyzdy qadam bolmaq.
– Ulttyq quryltaı otyrysynda Memleket basshysy qoǵamdaǵy ózekti máselelerdi sheshýde memleket pen úkimettik emes uıymdar arasyndaǵy seriktestikti arttyrýdyń mańyzyn atap ótip, ÚEU týraly zańnamany jáne memlekettik áleýmettik tapsyrystyń krıterıılerin jetildirýdi tapsyrdy. Osy maqsatta mınıstrlik quramyna óńirlik sarapshylar men azamattyq sektor ókilderinen turatyn jumys toptaryn qurdy, – dedi A.Balaeva.
Mınıstrdiń aıtýynsha, aldaǵy HII Azamattyq forým qoǵamdyq ınstıtýttardyń qyzmetin jańǵyrtýǵa jáne azamattyq qoǵamnyń damýyna jańa serpin bermek. Sondaı-aq A.Balaeva azamattyq qoǵammen bite-qaınasqan, ózara birlesken is-qımyl damýdyń sheshýshi tetigi ekenin atap ótti.
– Biz árdaıym syndarly dıalogke múddelimiz, óıtkeni qoǵamdaǵy ózekti máselelerdiń barlyǵy tek ashyq ári ózara qurmetke negizdelgen dıalog arqyly sheshiledi. Rasynda, bir problema sheshilse, alda jańa máseleler týyndaıdy. Sol sebepti dıalog úzilmeýge tıis. Qýantarlyǵy, búginde qoǵamda mundaı ózara túsinistik pen ashyq pikir almasý bar. Bizdiń búgingi kezdesýimiz osy baılanysty nyǵaıtyp, keńeıte túsetinine senimdimin. Aldaǵy 15-16 qazanda ótetin Azamattyq forýmnyń sapaly ári mazmundy bolǵany mańyzdy. Forým barysynda júıeli máselelerdi talqylap, naqty sheshimder qabyldanady dep senemiz. Búginde Azamattyq alıans memleket pen úkimettik emes uıymdar arasyndaǵy seriktestikti nyǵaıtýda mańyzdy ról atqaryp otyr. Bul uıym memlekettik qurylymdarmen ınstıtýsıonaldy deńgeıde ózara árekettesip, úlken jumys atqaryp keledi, – dedi A.Balaeva.
Sondaı-aq mınıstr qazir bizdiń basty mindetimiz dástúrli azamattyq forýmdy sapaly uıymdastyrý ekenin de atap ótti.
«Qazaqstannyń Azamattyq alıansy» qoǵamdyq birlestiginiń prezıdenti Baný Nurǵazıeva memleket pen qoǵam jumylǵan judyryqtaı seriktese áreket etken jaǵdaıda turaqty damý bolatynyn atap ótti. Onyń aıtýynsha, búginde elimiz azamattyq qoǵamnyń myqtylyǵyna burynǵydan da kóbirek muqtaj bolyp otyrǵan kórinedi.
– О́ıtkeni alda turǵan reformalardy memleket jalǵyz ózi júzege asyra almaıdy. Árbir úkimettik emes uıym óz salasyna qaraı reformalardyń júrgizýshisi ári halyqqa túsindirýshisi bolyp otyr. Aımaqtarda ótken azamattyq forýmdardyń jartysyna jýyǵy óńir ákimderiniń qatysýymen ótti. Bul – úlken ilgerileý. Buryn uıym ókilderimen kezdesýler arnaıy shaqyrý arqyly ótse, qazir jergilikti bılik ókilderi ózderi kelip, bastama kóterip otyr. Bul – qoǵamnyń shynaıy serpilisi. Prezıdenttiń alǵa qoıǵan strategııalyq mindetteri tek memlekettik organdarǵa emes, búkil elge ortaq. Eger biz damyǵan, básekege qabiletti memleketter qataryna qosylǵymyz kelse, úsh jyl ishinde tolyqqandy sıfrlyq memleketke aınalý jolynda bárimiz birigýimiz kerek. Bul ońaı sharýa emes, biraq azamattyq sektor bul baǵytta úlken kómek kórsete alady, – dedi Baný Ǵanıqyzy.
Kezdesýde qatysýshylar barlyq tirkelgen ÚEU men qaıyrymdylyq uıymdary týraly ashyq aqparatty qamtıtyn biryńǵaı elektrondy portal (E-ÚEU) qurýdy usyndy. Bul júıe uıymdardyń qyzmeti, memlekettik áleýmettik tapsyrystar men jobalardy iske asyrý kezeńderi týraly derekterdi ashyq formatta usynýǵa múmkindik beredi.
Sonymen qatar azamattyq jaýapkershilikti arttyrý, volonterlikti damytý jáne qoǵamdaǵy kelispeýshilikterdiń aldyn alý úshin medıasııa tetikterin engizý máseleleri talqylandy.
Mınıstrlik tarapynan Memleket basshysynyń tapsyrmalaryn iske asyrý boıynsha belsendi jumys júrgizilip jatqany atap ótildi. Atap aıtqanda, úkimettik emes uıymdar týraly jańa zań jobasyn ázirleý maqsatynda óńirlik sarapshylar men ÚEU ókilderi qatysatyn jumys toptary quryldy.
Kezdesý qorytyndysy boıynsha memlekettik organdar men úkimettik emes sektor arasyndaǵy yntymaqtastyqty odan ári nyǵaıtýǵa, sondaı-aq qoǵamnyń damýyna baǵyttalǵan azamattyq bastamalardy qoldaýǵa baǵyttalǵan naqty usynystar ázirlendi.
