Otandyq taýar óndirýshiler qoldaýǵa ıe

Ortalyq kommýnıkasııalar qyzmetinde «Samuryq-Qazyna Kelisimshart» JShS bas dırektory Serikbek Elshibekov, Májilis depýtaty Ekaterına Nıkıtınskaıa jáne atalǵan ál-aýqat qorynyń Satyp alý monıtorıngi jáne metodologııa departamentiniń dırektory Muhıt Maǵajanov brıfıng ótkizdi. Onda otandyq taýar óndirýshilerdi qoldaýǵa qatysty sharalar sóz boldy. «Nur Otan» partııasynyń kezekten tys HVI sezinde Memleket basshysy múmkindiginshe otandyq taýar óndirýshi kásiporyndarǵa qoldaý kórsetý kerektigine nazar aýdarǵan edi. Negizi óz elimizde jasalǵan ónimderdi paıdalaný arqyly kásiporyndardy qoldaý sharasy birneshe jyldan beri jalǵasyp keledi. Desek te, sońǵy ýaqyttaǵy álemdik daǵdarys pen kórshi Reseı eliniń ulttyq valıýtasynyń eselep qunsyzdanýy bul sharany taǵy da shırata túsýge májbúr etip otyr. Otandyq kásiporyndardyń shyǵarǵan taýarlary arzan baǵamen aǵylyp kelip jatqan kórshi taýaryna tótep bere almaı tur. Osy orynda otandyq kásiporyndardyń jumysyn áli de jan­dan­dyra túsý maqsatynda «Samuryq-Qazyna» qory birqatar qoldaý sharalaryn qolǵa alypty. Qordyń kompanııalar tobyndaǵy satyp alýdyń ashyqtyǵy men qazaqstandyq úlesti arttyrý jóninde áńgimelegen S.Elshibekov satyp alý tártibi qabyldanǵan 6 jyl ishindegi jetistikterge toqtaldy. «Búgingi tańda «Samuryq-Qazyna» AQ satyp alý tártibin qor quramyna kiretin 250 uıym iske asyryp otyr. 2009 jyldan beri 150 myń satyp alý sharty jasalǵan. Qordyń satyp alýdaǵy 75 paıyzy qazaqstandyq taýar óndirýshilerdiń úlesinde jáne bul kórsetkish ósý ústinde. Qordyń satyp alý tártibine sáıkes otandyq óndirýshilerge 14 jeńildikten turatyn preferensııalar qarastyrylǵan. Biz osy tártipke satyp alý salasyndaǵy ozyq tájirıbelerdi qoldandyq, qatysýshylardyń pikirinshe satyp alý úrdisi yńǵaıly ári tıimdi qalypqa kóshti. Nátıjesinde satyp alý, kelisý men sheshim qabyldaý sharttary ońtaılanyp, negizgi jabdyqtaýshylarǵa qoıylatyn talaptar jeńildetildi», dedi bas dırektor. Nurbaı ELMURATOV, «Egemen Qazaqstan».