Syrym aýdanynda «Jastar tájirıbesi» baǵdarlamasyn júzege asyrý maqsatynda respýblıkalyq transfertten jáne jergilikti bıýdjetten 12 mln. 992 myń teńge qarjy bólindi. Osy bólingen qarjyǵa shilde aıynyń alǵashqy onkúndigi aralyǵynda 61 jas maman negizgi mamandyqtary boıynsha aýdandaǵy 42 mekemege «Jumyspen qamtý ortalyǵy» MM arqyly 6 aı merzimge jumysqa joldandy. Jumysqa joldanǵandardyń arasynda mal dárigeri, bilim berý, aqparattyq júıeler, baılanys tehnıgi, elektrmen qamtamasyzdandyrý, qarjyger, jol qurylysyn qadaǵalaý, týrızm, áleýmettik qyzmetker, mádenıet, beıneleý jáne syzý óneri sııaqty sala ıeleri bar. Eń bastysy, aýdanda qolǵa alynǵan «Jastar tájirıbesi» baǵdarlamasynyń maqsaty elimizdegi joǵary jáne arnaıy orta bilim ordalaryn bitirgen, áıtsede mamandyǵy boıynsha joly bolmaı júrgen jastardy turaqty jumyspen qamtý, olarǵa qoldaý kórsetý bolatyn.
Músirbek AITAShEV. Syrym aýdany, Batys Qazaqstan oblysy.
