Foto: Aqorda
Buǵan deıin eki el prezıdentteri «Ortalyq Azııa – Reseı» sammıti, TMD memleketter basshylarynyń keńesi otyrysyna qatysqan bolatyn.
«12 qarasha kúni Sizdiń shaqyrýyńyzben Reseıge saparmen baramyn. Biz buǵan erekshe mán berip otyrmyz. Bul sapar eki el arasyndaǵy strategııalyq seriktestik pen odaqtastyq qatynastarǵa tyń serpin beredi dep oılaımyn. Qazaqstan men Reseıdi shyn máninde máńgi odaqtastyq, strategııalyq seriktestik jáne dostyq qarym-qatynastar baılanystyrady. Kórsetkishterge kóńil tolady. Meniń Reseıge jasaıtyn saparymnyń aldynda ózara saýda kólemi joǵary deńgeıge jetti. Byltyr onyń kólemi 28 mıllıard dollardy qurady. Reseı bizdiń ekonomıkaǵa qarjy quıyp otyrǵan negizgi ınvestorlardyń biri. Osy jyldar ishinde Reseı bıznesi Qazaqstanǵa 26 mıllıard dollardan astam ınvestısııa saldy. О́tken jyldyń ózinde elimizge 4 mıllıard dollar ınvestısııa keldi. Birqatar iri jobalar júzege asyrylyp jatyr. Jalpy quny 22 mıllıard dollarǵa jýyq 114 jobanyń iske asyrylǵanyn mysalǵa alsaq ta jetkilikti. Bul baǵyttaǵy jumys áli de jalǵasady», dedi Memleket basshysy.
Vladımır Pýtın óz kezeginde Qazaqstanmen qarym-qatynasty joǵary baǵalaıtynyn atap ótti.
«Eki el arasyndaǵy baılanystardyń sıpaty erekshe. Buǵan Siz ben bizdiń dostyǵymyz ǵana yqpal etip otyrǵan joq. О́ıtkeni Qazaqstan men Reseı postkeńestik keńistiktegi ıntegrasııalyq úderisterge bastamashy bolyp kele jatqany belgili. Bizde turaqty túrde nazar aýdaratyn ekijaqty máseleler jetkilikti. О́z tarapymnan Qazaqstan-Reseı baılanystaryn damytýǵa qosqan úlesińiz úshin Sizge alǵys aıtamyn. Ekijaqty formattaǵy osyndaı kezdesýlerimiz yntymaqtastyǵymyzdy damytý úshin paıdaly bolatynyna senimdimin», dedi Reseı Prezıdenti.
