– Týrızmdi damytý – memlekettiń basym baǵyttarynyń biri. Týrızmdi qoldaý, qolaıly ınvestısııalyq ahýal qalyptastyrý, bızneske jańa múmkindikter ashý baǵytynda memleket naqty sharalar qabyldap jatyr. Bıyl Mańǵystaý oblysyn damytýdyń 2025–2029 jyldarǵa arnalǵan keshendi jospary bekitildi. Qujat aıasynda jalpy quny 401 mlrd teńgeni quraıtyn 100-den astam is-shara qarastyrylǵan. Forým óńirdiń jańa múmkindikterin ashatyn mańyzdy qadam bolmaq, – dedi Týrızm jáne sport mınıstri Erbol Myrzabosynov.
Is-sharanyń Mańǵystaý óńirinde ótýi beker emes, óıtkeni Mańǵystaý – bolashaǵy týrızm salasymen tikeleı baılanysty sanalatyn, qazirde osy baǵytta jaqsy bastamalardyń qazyǵy qaǵylyp, uıymdastyrý jumystary qolǵa alynyp jatqan óńir. Týrızm jáne sport mınıstrligi ázirlep, Úkimet qaýlysymen qabyldanǵan 2025–2029 jyldarǵa arnalǵan keshendi jospar óńirdi 9 baǵytta júıeli damytýdy qamtıdy. Týrıster tartýǵa jan-jaqty jaǵdaı jasap, óńirdiń odan ári damýyna qolaıly ınvestısııalyq ahýal qalyptastyrýǵa múmkindik beredi. Mańǵystaý oblysynyń ákimi Nurdáýlet Qılybaı óńirdiń týrıstik salasyn damytýǵa toqtala kelip, ınfraqurylymdyq jobalardyń qalypty iske asyrylyp jatqanyn málimdedi.
– Mańǵystaý – munaı men gaz ǵana emes, sondaı-aq qaıtalanbas tabıǵı, mádenı murasy mol, erekshe óńir. Prezıdent tapsyrmasyna sáıkes oblysty týrızmdi damytý baǵytynda júıeli jumys atqarylyp, týrıster men ınvestorlarǵa tartymdy ortalyqqa aınaldyrýǵa qolaıly jaǵdaı jasalyp jatyr. Maqsat – halqymyzdyń ulttyq dástúrlerin saqtaı otyryp, Mańǵystaýda týrızm salasyn barynsha damytý kerek, – degen aımaq basshysy Mańǵystaý óńiriniń elimizdiń týrıstik kartasynda aıryqsha orynǵa ıe ekendigin, Kaspıı teńiziniń jaǵalaýy, Bozjyra men Qyzylkúp shatqalynyń qaıtalanbas landshafttary, baı tarıhı-mádenı murasy aımaqty Ortalyq Azııadaǵy eń áleýetti týrıstik baǵyttardyń birine aınaldyratyndyǵyn atap ótti.
Týrızm salasyndaǵy memlekettik sektor men halyqaralyq uıymdardyń, kásipkerlerdiń ortaq alańyna aınalǵan forýmda qatysýshylar ınvestısııa tartý joldary, ınfraqurylymdy damytý, týrıstik qyzmetterdiń qoljetimdiligi, ishki áýe qatynasyn damytý máseleleri týraly keńesti.
Mańǵystaý Ortalyq Azııadaǵy týrızm habyna aınalyp keledi. Mysaly, óńirge tartylyp jatqan iri ınvestısııalyq jobalardyń qatarynda «PANA» kompanııasynyń quny 8,5 mln dollar «Sandyq» etno-meıramhanasy men ashylýy 2026 jylǵa josparlanǵan «Tary» etno-kofehanasy bar. Forým aıasynda ınvestorlarǵa 15 jylǵa deıingi jeńildetilgen nesıeler, 1:3 araqatynasymen birlesip qarjylandyrý syndy jańa múmkindikter usynyldy. Wellness, turaqty týrızm taqyryptary talqylanǵan «Qyzmet pen qaýipsizdik» sessııasynda qytaılyq «Zowoyoo Technology» kompanııasy elimizdi Qytaı naryǵynda damytý strategııasyn tanystyrsa, «Týrıstik qamqor» júıesi otandyq týrısterdiń sheteldegi qaýipsizdigin qamtamasyz etý máselesin usyndy. Ulttyq statıstıka bıýrosy ishki týrızmdi baǵalaý ádistemesi jónindegi jańa jobasyn tanystyrdy.
Forýmda elimizdiń MICE-ındýstrııadaǵy orny talqylandy. Spıkerlerdiń aıtýynsha, qazirde elimiz 87 elge vızasyz rejim usynyp otyr, jańa termınaldar ashyldy, 45 kongress-qonaqúı iske qosyldy. 2024 jyly elimizde 14 halyqaralyq is-shara ótkizilip, shamamen 14 mıllıon dollar kóleminde ekonomıkalyq paıda ákeldi.
Forým barysynda Mańǵystaý oblysynyń ákimdigi men «Báıterek» ulttyq basqarýshy holdıngi» AQ Mańǵystaýdaǵy bıznesti qoldaý men týrızmdi damytýǵa baǵyttalǵan yntymaqtastyq memorandýmyna qol qoıdy. Ekinshi deńgeıli bankter arqyly júzege asatyn ekijaqty kelisim aıasynda shaǵyn jáne orta kásipkerlikti qarjylandyrýdyń jańa múmkindikteri qarastyrylǵan.
– Mańǵystaý oblysynda bıznestiń damý áleýeti zor. Memorandým kásipkerlerge qajetti qarajatqa qol jetkizýge, óndiristi keńeıtýge, jańa jumys oryndaryn ashýǵa múmkindik beredi. «Báıterek» óńir týrızmin damytýda senimdi áriptes bolýǵa daıyn. Holdıng pen oblys ákimdiginiń seriktestigi Mańǵystaýdyń týrıstik tartymdylyǵyn arttyryp, jańa jobalardyń júzege asýyna jol ashady, – dedi «Báıterek» ulttyq basqarýshy holdıngi» AQ basqarma tóraǵasynyń orynbasary Jandos Shaıhy.
Týrızm jáne sport mınıstrligi 2025–2028 jyldarǵa arnalǵan kýrortty óńirlerdi damytý jónindegi Jol kartasynyń jobasyn ázirledi. 141 is-shara engizilgen jobany júzege asyrý respýblıkalyq, jergilikti bıýdjetterden, jeke ınvestısııa esebinen qarjylandyrylady. E.Myrzabosynov bıyl 1 qarashaǵa deıin óńirlerge qatysty ınfraqurylymdyq qajettilik kartasyn daıyndaýdy aıaqtap, ákimdikter deńgeıinde is-qımyl josparlaryn bekitýdi, keıbir óńirlerde áli aıaqtalmaǵan týrıstik marshrýttardy abattandyrý, bas josparlardy sıfrlandyrý jumystaryn jandandyrýdy, halyqaralyq týrızm jáne meımandostyq ýnıversıtetimen birlesip, jyl sońyna deıin saladaǵy kadr tapshylyǵyna taldaý júrgizýdi, 1 jeltoqsanǵa deıin 2026 jylǵa arnalǵan iri taqyryptyq is-sharalar kúntizbesin daıyndaýdy, onyń ishinde kem degende bir aýqymdy týrıstik is-shara josparlaýdy tapsyrdy.
Mańǵystaý oblysy
