Aksııaǵa memlekettik qyzmetshiler, stýdentter, eriktiler, belsendi jastar, qala turǵyndary atsalysty. Is-sharaǵa oblys ákimi Qumar Aqsaqalov arnaıy kelip qatysyp, qala turǵyndarymen áńgimelesip, kóppen birge kúrek ustap, kóshet otyrǵyzdy.
Ekologııalyq aksııaǵa bútin áýletimen shyǵyp, ózderiniń otbasylyq aǵashyn egip jatqan turǵyndar da bar. Solardyń biri – Qoldasbaevtar áýleti.
«Búgingi aksııaǵa ulymdy, kelinimdi, nemerelerimdi ádeıi ertip keldim. Ákem ómir boıy bala oqytyp, ustazdyq etti. О́zim Ybyraı Altynsarın atyndaǵy Arqalyq pedagogıkalyq ýnıversıtetiniń dosentimin, ardager ustazbyn. Nemerem Erlan da ustazdyq jolyn tańdady. Búgingi senbi - bárimiz úshin qýanyshty kún dep esepteımiz. О́ıtkeni bul tazalyq aksııasy eń aldymen ózimizge kerek, halqymyzdyń ekologııalyq mádenıetin qalyptastyratyn izgilikke bastaıtyn máni tereń, mańyzy zor is-shara dep bilemin. Prezıdentimizdiń Joldaýynda da osy tazalyq máselesi aıtyldy. Memleket basshysy Torǵaı óńiri Úkimettiń aıryqsha nazarynda bolatynyn aıtty. Osynyń bári Arqalyqtyń, jalpy Torǵaı kelesheginiń jarqyn ekenin kórsetedi. Jalpy, halyqtyń jaǵdaıy jaqsaryp, Arqalyǵymyz da jyldan-jylǵa jańaryp, gúldenip, kórkeıip kele jatyr», deıdi qala turǵyny Zına Qoldasbaeva.
Ahmet Baıtursynuly saıabaǵyna qalanyń belsendi jastary 200-ge jýyq aǵash kóshetin otyrǵyzdy.
«Kezinde Memleket basshysy Qasym-Jomart Toqaevtyń bastamasymen bastaý alǵan «Taza Qazaqstan» jalpyulttyq ekologııalyq aksııasy búginde biz úshin dástúrli is-sharaǵa aınaldy. Aksııa bastalǵaly qalamyzdy kórkeıtýge, ózimiz ómir súrip jatqan ortany, aınalamyzdy taza ustaýǵa baǵyttalǵan senbilikter, búgingideı kóktemgi, kúzgi aǵash otyrǵyzý jumystary jıi ótip turady. Búgin búkil qala aýmaǵynda ótip jatqan aǵash otyrǵyzý aksııasyna osyndaǵy 4 kolledj ben Arqalyq pedagogıka ýnıversıtetiniń stýdentteri shyqty. Máselen, ózimiz turǵan Ahmet Baıtursynuly saıabaǵynda polıtehnıkalyq kolledj stýdentteri qaraǵaı, qaıyń kóshetterin otyrǵyzyp jatyr. Jalpy, Arqalyq jastary Prezıdent bastamasyn qashan da qoldaıdy. «Taza Qazaqstan» baǵdarlamasy eldi mekenderdiń sanıtarlyq jaǵdaıyn jaqsartýdan bastap, jasyl aımaqtardy qalpyna keltirýge jáne ınfraqurylymdy jańǵyrtýǵa deıingi keń aýqymdy mindetterdi qamtıdy. Bizdiń Torǵaı óńirine de erekshe nazar aýdarylyp jatyr. Aldaǵy ýaqytta munda kóptegen ekologııalyq bastamalar iri ınfraqurylymdyq jobalarmen qatar júzege aspaq. Onyń ishinde Torǵaıdy damytýda aıryqsha strategııalyq mańyzǵa ıe «Ortalyq – Batys» avtojolynyń qurylysy da bar», deıdi qalalyq jastar resýrstyq ortalyǵynyń basshysy Danııar Qojahmetov.
