Senat Memleket basshysynan Prezıdent saılaýyn taǵaıyndaýdy surady

ASTANA. 19 aqpan. Búgin Parlament Senatynyń jalpy otyrysynda palata depýtattary Qazaqstan halqy Assambleıasy keńesiniń kezekten tys prezıdent saılaýyn ótkizý týraly usynysyn qarap, Prezıdent N. Nazarbaevqa Úndeý joldady. Bul týraly «QazAqparat» habarlady. «Qurmetti Nursultan Ábishuly! Parlament Senaty Qazaqstan halqy Assambleıasy keńesiniń kezekten tys Prezıdent saılaýyn ótkizý týraly bastamasyn tolyǵymen qoldaıdy. Ýaqyttyń ózi talap etip otyrǵan bastama barsha halyqtyń qyzý qoldaýyna ıe boldy, qazaqstandyq qoǵamda oń pikirler qalyptastyrdy. Halyqaralyq shıelenistiń artyp otyrǵan jaǵdaıynda jahandyq ekonomıkada daǵdarys qubylystary kúsheıe túsken ýaqytta ishki saıası turaqtylyqty qamtamasyz etý, Siz aıqyndaǵan álemniń ozyq otyz eliniń qataryna enýdi maqsat etetin «Qazaqstan-2050» uzaqmerzimdi strategııasyn, Máńgilik El tujyrymdamasyn, «Nurly jol» baǵdarlamasyn júzege asyrýǵa jaǵymdy ahýal qalyptastyrý qajet. Sizdiń dana ári kúshti kóshbasshylyǵyńyzben Qazaqstan óziniń damýy men qalyptasýyna qatysty barlyq qıynshylyqtardy laıyqty eńserdi. Táýelsizdik jyldary Sizdiń saıasatyńyzdyń nátıjesinde naryqtyq ekonomıkasy damyǵan, halyqaralyq qaýymdastyq aldynda bedeldi, qýatty memleket qalyptasty. Sondyqtan da, qazaqstandyqtar barlyq jetistikterdi Sizdiń atyńyzben baılanystyrady», - dedi palata atynan Úndeýdi jarııalaǵan Senat tóraǵasy Qasym-Jomart Toqaev. Budan bólek, Úndeýde Qazaqstannyń óz damýynyń jańa satysyna aıaq basqany aıtylyp, belgilengen reformalardy odan ári ilgeriletýge baǵyttalǵan Elbasy baǵdaryn tabysty júzege asyrýdyń sózsiz sharty bolyp tabylatyn turaqtylyqtyń mańyzy zor ekenine nazar aýdarylady. «Biz Parlament Senatynyń depýtattary Prezıdenttiń kezekten tys saılaýyn ótkizý elimizde beıbitshilikti, birlik pen kelisimdi nyǵaıtýǵa yqpal etetindigine senimdimiz. Asa qurmetti Nursultan Ábishuly, Sizden Qazaqstan halqy Assambleıasy Keńesiniń bastamasyn qoldap, kezekten tys Prezıdent saılaýyn taǵaıyndaý týraly máseleni qarastyrýyńyzdy suraımyz», delingen Úndeýde. Murat Aıtqoja.