– Zańsyz aınalymnan 525 keliden astam esirtki zaty, onyń ishinde 52 keli sıntetıkalyq jáne 3 tonnadan astam prekýrsor tárkilendi. Sondaı-aq qylmystyq jolmen alynǵan 255 mıllıon teńgeden astam aqsha men múlik memleket kirisine ótkizildi, – dedi Almaty qalasy polısııa departamenti bastyǵynyń birinshi orynbasary Qýatbek Naýatov.
Sonymen qatar eki esirtki zerthanasynyń qyzmeti toqtatylyp, esirtkini ótkizý jáne taratýǵa qatysy bar 3 qylmystyq toptyń áreketi áshkerelendi.
Polısııa qyzmetkerleri qazirgi zamanǵy sıfrlyq tehnologııalardy belsendi qoldanýda. Ulttyq bank jáne Mádenıet jáne aqparat mınıstrligimen birlesken jumys nátıjesinde bıyl zańsyz esirtki aınalymyna qatysy bar 1,5 myń otandyq jáne 5 myńnan astam sheteldik bank kartasy, sondaı-aq 312 krıptoámııan anyqtalyp, buǵattaldy.
68 mıllıon teńge somasyndaǵy kúdikti bank operasııalarynyń qyzmeti toqtatyldy. Esirtki taratýǵa paıdalanylǵan 2200 ınternet-resýrs buǵattaldy. Olardyń 27-si – telegram-arna.
Bilim berý uıymdary, jastar birlestikteri jáne jergilikti atqarýshy organdarmen birlesip, 700-den astam kezdesý, naýqan jáne túsindirý is-sharalary ótkizildi.
Qala kóshelerinde esirtki jarnamasy bar graffıtıler kún saıyn boıalyp, áleýmettik beınerolıkter kórsetilip, jedel jeli men anonımdi chattar turaqty túrde jumys isteıdi.
– Esirtkige qarsy kúres – tek polısııanyń qolynda emes. Bul – búkil qoǵamnyń ortaq jaýapkershiligi. Ata-analardan bastap, pedagogtar, BAQ ókilderi men bıznes qaýymdastyǵyna deıin. Tek birlesip, belsendi azamattyq ustanymmen biz esirtki qaýipine qarsy tıimdi tosqaýyl qoıa alamyz. Polısııa osy baǵyttaǵy júıeli jumysyn jalǵastyra beredi, basty basymdyq – jazalaý emes, aldyn alý men túsindirý jumystary, – dedi Qýatbek Naýatov.
