Kisilik taǵylymy

Taǵylymdy keshtiń ótýine Juma­ǵańnyń ózi ádebıet pen jýrnalıstıkaǵa baýlyǵan shá­kirtteri uıytqy bolǵan. Jazýshynyń týǵan kúninde kópshilikke tanystyrylǵan estelik jınaqta Jumabaı Shashtaı­ulynyń kisilik kelbeti, adamı ajaryna daq túsirmegen parasaty men qar­paıymdylyǵy qalamdastary men shákirtteri tarapynan jyly kórinis tapqan. Sondaı-aq jańa týyndyda qalamgerdiń ómir joly, shyǵarmashy­lyq ustanymy, zamandastarynyń estelikteri men sırek arhıvtik mate­rıaldar da qamtylǵan.

Aqyn Ulyqbek Esdáýlet tizgindegen rýhanı keshte Arhıv, qujattama jáne kitap isi komıtetiniń tóraǵasy Rýs­tam Álı Mádenıet jáne aqparat mınıstri Aıda Balaevanyń jazýshy shyǵar­mashy­lyǵy haqyndaǵy jyly lepesin jetkizdi.

«Jumabaı Shashtaıuly – qoǵam júgin, el muńyn kótergen mazmuny tereń maqalalar, shoqtyǵy bıik shyǵarmalar jazyp, ult rýhanııatyna súbeli úles qosty. Sońynan erip, qolyna qalam usta­ǵan jastarǵa rýhanı áke bolyp, shákirtteriniń shyraǵyn jaqty, talantyn ushtady. Ult mádenıetine zor eńbek sińirgen osyndaı tulǵalardyń esimin ulyqtaý rýhanı sabaqtastyqtyń, eldiktiń belgisi» delingen quttyqtaý hatta.

Basqosýda Jazýshylar odaǵy tór­aǵa­synyń orynbasary Ǵalym Qalı­bekuly, ult prozasyna «Aspanqora», «Quralaıdyń salqy­ny», «Qyzyl qar», «Aıaz bı» sekildi súbeli shy­ǵarmalar syılaǵan qalamgerdiń jazý ónerindegi jarqyn joly týraly aıta kelip, «Qazaq ádebıeti» gazeti Jumaǵań basqarǵan jyl­dary erekshe mazmunmen jaryq kórge­nin atap ótti.

Al ádebıet synshysy Beken Yby­­­raıym: «Proza tarıhynda birden óz betin aıqyndap, ónimdi jolǵa túskender de, bertinge deıin árqıly izdenister órisin sharquryp sharlap, ózin-ózi synap baryp, tabystarǵa jetkender de az emes. Jumabaı Shashtaıulyn birden-aq óz jolyn tapqan baqytty qalamgerlerdiń qataryna qosar edik. Shyǵarmashylyq nysanasyn birden aıqyndap, túrli ızmderge eliktep-solyqtamaı, shyndyqty altyn arqaý etip tańdady da, sol baǵytta óziniń kórkemdik álemin jasady. Ol qaı shyǵarmasynda bolsyn, eń aldymen el ómirindegi aıtýly ózgeristerdi, adamdardyń taǵdyryn, tabıǵatyn, qara­paıym tirshiligin qalamyna ózek etti», dep eske aldy.

Jazýshy týǵan topyraq Jambyl ­aýdany jurtshylyǵynyń yqylasyn ala kelgen aýdan ákimi Nurlan Ertas­uly, jerlesteri Jumaǵańnyń ádebıet pen jýrnalıstıkadaǵy ónegesin maqtan ­tu­tatynyn, onyń shyǵarmashylyq ­eńbek­teri urpaqqa mura ekenin atap ótti.

ALMATY