«Bizdiń maqsatymyz – bazarlardy qaıta salý ǵana emes, qaýipsiz ári qolaıly saýda keńistigin qalyptastyrý. Munda bıznes damyp, qala turǵyndary ózin jaıly sezinýi tıis. Bul satyp alýshylardy, kásipkerler men qalanyń ózin qorǵaýǵa baǵyttalǵan «Saýda qyzmetin retteý týraly» QR Zańynyń talabynp negizdelgen», – deıdi Almaty ákiminiń orynbasary Oljas Smaǵulov.
Búginde Almatyda 29 bazar tolyqtaı jańǵyrtylyp, olardyń aýmaǵynda iri qurylystar salyndy, ınjenerlik ınfraqurylym jańartyldy. Oǵan qosa taǵy 21 bazar jańǵyrtylyp jatsa, bul jumystar 2026 jyldyń sońyna deıin aıaqtalady. Eskirgen «Jibek joly» bazarynyń ornyna jańa menshik ıesi osy zamanǵy turǵyn úı kesheni men saýda ortalyǵyn salǵaly otyr.
Jalpy, sońǵy jyldary qaladaǵy bazarlardyń sany keıbireýleriniń ornyna saýda ortalyqtary boı kótergendikten, 59-dan 51-ge deıin azaıdy.
Degenmen ákimdik kásipkerlerdiń nege alańdaıtynyn túsinedi. Jalǵa alý baǵasynyń qymbattaı túsýi paıdany arttyrý maqsatynda emes, qaıta jańǵyrtýdan keıingi paıdalaný men kommýnaldyq shyǵyndardyń kóbeıýine baılanysty týyndap otyr. Sebebi jańartylǵan bazarlar ortalyqtandyrylǵan jylý, sý, káriz júıelerine qosylady, sanıtarlyq talaptar men abattandyrylǵan aýmaq qamtamasyz etiledi. Rekonstrýksııa kezeńinde jalǵa alýshylarǵa saýda oryndary ýaqytsha jeńildikpen beriledi.
Osy arada QR Ákimshilik quqyq buzýshylyq týraly kodeksiniń 204-2-babyna sáıkes, bazarlardy modernızasııalamaý ákimshilik jaýapkershilik júkteıtinin aıta ketý kerek. 2026 jylǵy 1 qańtardan bastap talaptardy oryndamaǵan bazarlardyń qyzmeti ýaqytsha toqtatylady.
