EKSPO-2017: jumys alańy

Qazirgi kúnderi Astanadaǵy EKSPO-2017 kórme kesheni qury­lysyn júrgizý jandana bastady. Mundaǵy birqatar qurylys nysan­daryn­daǵy jumystar tipti aldyn ala belgi­lengen kesteden de ozyq keledi. Solar­dyń biri – ákimshilik ǵımaraty búgin­de birshama boı kóterip, óziniń qa­tar­ǵa qosylatyn sátin jaqyndata túsýde. Búkilálemdik kórme kesheni qurylysynyń bas merdigeri bolyp tabylatyn kompanııanyń basshysy Nurjeke Ahmadıevtiń aıtýyna qaraǵanda, ákimshilik ǵımaratty bıylǵy qazan aıynda paıdalanýǵa berý josparlanyp otyr. Qazir qurylys kelbetine qaraı otyryp, onyń tolyq aıaqtalǵannan keıin qandaı pishinge kóshetinin kózge elestetý qıyn emes. Barynsha joǵary deńgeıdegi yńǵaılylyq pen qolaılylyqty basty maqsaty etip ustanǵan ǵımarattyń aýqymy 29 myń sharshy metrdi quraıdy. Osy kezde búkil «EKSPO-2017» keshenine IT-tehnologııanyń jalpy baqylaý jasaýyn júzege asyratyn jedel basqarý ortalyǵy ekinshi qabatqa ornalasatyny da belgili boldy. Munda qalashyq aýmaǵynda qadam basqan saıyn ornalasatyn barlyq ekrandar men monıtorlardaǵy jazbalar, barsha nysandar jónindegi málimetter sát saıyn quıylyp kelip turady. Bul keshen qyzmetkerleriniń kórme terrıtorııasynda ne bolyp jatqanyn udaıy baqylap otyrýlaryna múmkindik beredi. Budan bólek, kórmeniń barlyq ofısteri osy ǵımaratta ornalasatyn bolady. Olardyń arasynda budan basqa, taǵy maket zaly, konferens-zal, qaraý alańy sekildi baspananyń arnaıy jabdyqtary men quraldary qonys tebedi. Sonymen, keshenniń eń alǵashqy nysan qurylysy tolyq aıaqtalyp, paıdalanýǵa beriletin shaǵyna tym kóp qalǵan joq. Murat AITQOJA.