Uıym ókilderiniń aıtýynsha, donor elderden bólinetin qarjy kóleminiń kúrt azaıýy, qaqtyǵystar men klımattyq daǵdarystardyń kúsheıýi gýmanıtarlyq kómek júıesin tyǵyryqqa tirep otyr. Sonyń saldarynan buryn turaqty túrde azyq-túlik kómegin alyp kelgen mıllıondaǵan adam endi kúndelikti tamaqtaný múmkindiginen aıyrylýy múmkin.
Bıylǵy jyly BUU baǵdarlamalaryna arnalǵan qarjy kólemi sońǵy on jyldaǵy eń tómen deńgeıge túsken. Ásirese Afrıka men Taıaý Shyǵys elderindegi jaǵdaı kúrdeli. Sýdan, Somalı jáne Iemende ashtyq deńgeıi qaýipti shekke jetip, turǵyndardyń jartysynan astamy azyq-túlik tapshylyǵyn bastan ótkerýde. Sarapshylar daǵdarystyń negizgi sebepterin qarýly qaqtyǵystardyń kúsheıýi, klımattyń ózgerýi men qurǵaqshylyq, sondaı-aq álemdik ekonomıkanyń baıaýlaýymen baılanystyrady. Soǵys pen apattar saldarynan aýyl sharýashylyǵy ónimderi azaıyp, azyq-túlik baǵasy buryn-sońdy bolmaǵan deńgeıge kóterilgen.
WFP bas dırektory Sındı Makkeın halyqaralyq qaýymdastyqty tez arada áreket etýge shaqyryp, «Ashtyq – tabıǵı apat emes, ol adamdardyń áreketiniń saldary. Eger biz birlese qımyldamasaq, mıllıondaǵan adam ómirinen aıyrylýy múmkin», dedi. О́tken jyly WFP shamamen 150 elde 120 mıllıon adamǵa kómek kórsetkenimen, bıyl uıymnyń bıýdjeti 30 paıyzǵa qysqaryp, kóptegen gýmanıtarlyq jobalar ýaqytsha toqtatylǵan.
BUU málimetine súıensek, búginde álemde 830 mıllıonǵa jýyq adam turaqty túrde ashtyqtan zardap shegýde. Bul sońǵy on bes jyldaǵy eń joǵary kórsetkish. Sarapshylardyń pikirinshe, ashtyqpen kúres tek qarjylaı kómekpen emes, sonymen qatar beıbitshilik ornatý, klımattyq saıasatty kúsheıtý jáne ádil saýda júıesin damytý arqyly ǵana nátıjeli bolmaq.
