Qazaqstan táýelsizdik alǵanǵa deıin elimizde kásibı apattyq-qutqarý qyzmeti bolmaǵan edi. Sol jyldary adamdardy jáne qoǵamdy apattyq jaǵdaılardan qutqarý isimen kóbine qoǵamdyq uıymdar men erikti qutqarý beketteri aınalysqan. Al bul mindettiń bir bóligi mılısııa qyzmetkerlerine júkteldi.
Memlekettik deńgeıde mańyzdy bul qyzmet júıesin qalyptastyrý maqsatynda 1995 jyly elimizdiń tótenshe jaǵdaılar jónindegi memlekettik komıteti quryldy. Osy tarıhı sheshimniń nátıjesinde 19 qazan – Qutqarýshylar kúni bolyp belgilendi.
Tótenshe jaǵdaılar salasy — úlken jaýapkershilikti, temirdeı tártip pen rýhanı beriktikti talap etetin sala. Bul qyzmettiń ókilderi kez kelgen tosyn jaǵdaıdyń aldyn alyp, zardabyn joıýǵa bar kúshin salady. Apatqa ushyraǵan adamdardy qutqaryp, alǵashqy medısınalyq kómek kórsetedi. Sondyqtan da qutqarýshylar zamanaýı qural-jabdyqtarmen jaraqtandyrylyp, únemi kásibı, medısınalyq jáne psıhologııalyq turǵyda daıyndyqtan ótip otyrady.
Osyndaı erlik pen tabandylyqtyń jarqyn úlgisin Jambyl oblysy Tótenshe jaǵdaılar departamentiniń Azamattyq qorǵaý podpolkovnıgi Shynbolat Berikuly Ázimbaev kórsetip keledi.
Ol 2007 jyly Kókshetaý tehnıkalyq ınstıtýtyn támamdap, sodan beri órt sóndirý salasynda taban aýdarmaı eńbek etip keledi. Qazirgi tańda Jambyl oblystyq departamentinde jedel kezekshi qyzmetin atqarady.
«О́rt sóndirý mamandyǵyn tańdaýyma ákem sebep boldy. Ol da ómir boıy osy salada eńbek etip, zeınetke shyqqan. Men ákemniń jolyn jalǵap, osy qyzmetti tańdadym. Tipti jubaıym da bul saladan alys emes — ol 112 nómirinde dıspetcher bolyp isteıdi», deıdi qutqarýshy.
Bul mamandyqtyń aýyrtpalyǵy az emes. Qutqarýshy kún saıyn qaýipti ortaǵa kirip, adam ómirin arashalap qalady. Degenmen, Shynbolat Berikuly óz tańdaýy úshin esh ókinbeıdi.
«Kez kelgen tótenshe jaǵdaıda órt sóndirýshi eń aldymen óz ómirin emes, adamdardyń amandyǵyn, órttiń taralý qaýpin oılaıdy. Naǵyz órt sóndirýshi batyl, qyzmetine adal jáne qorqynyshyn jeńe biletin adam bolýy kerek», dep oıyn túıindedi ol.
2021 jyly Jambyl oblysyndaǵy ınjenerlik oq-dáriler qoımasynda bolǵan jarylys kezinde ol aýyr jaraqat alǵan eki qyzmetkerdi ottyń arasynan aman alyp shyqqan. Sol oqıǵa kezinde ózi de jaraqat alǵanymen, qyzmetinen bas tartpady. Al sońǵy oqıǵada bes qabatty turǵyn úıden shyqqan órt kezinde úsh balany qutqaryp, olardyń ómirin saqtap qaldy.
Kórsetken erligi úshin ol Memleket basshysynyń qolynan Saǵadat Nurmaǵambetov atyndaǵy I dárejeli «Aıbyn» ordenimen marapattaldy.
«Búgingi marapat óte keremet ótti. Prezıdent Qasym-Jomart Kemelulynyń qolynan marapat alǵanyma, óte qýanyshtymyn. Buǵan deıin mundaı marapat alǵan emespin. Prezıdentke, mınıstrlikke jáne TJD basshylyq quramyna bizdiń eńbegimizdi baǵalaǵany úshin alǵys aıtamyn», deıdi Shynbolat Berikuly.
Qutqarýshylardyń qyzmeti — kózge kórinbeıtin, biraq el ómiriniń qaýipsizdigin qamtamasyz etetin mańyzdy tirek. Olar kúnniń ystyǵy men sýyǵyna, jel men tútinge qaramaı, «tilsiz jaýmen» kúresip, ár adamnyń ómiri úshin arpalysyp keledi.
Sondyqtan Qutqarýshylar kúni – bul jaı ǵana kásibı mereke emes, el amandyǵy úshin aıanbaı eńbek etetin, erlik pen adamgershiliktiń sımvolyna aınalǵan jandardyń merekesi.
